Mizoram Police leh Ramhlun Athletic an 'comeback': MPL11 league khelh tawp ni boruak a 'hot' dawn

Kuriz MPL11-ah Mizoram Police leh Chanmari FC te 2-2 in an inhnehtawk a, inkhel hnuhnung zawkah Ramhlun Athletic-in FC Bethlehem chu 4-3 in an lehthal bawk. Nimin inkhel result avangin MPL11 boruak a hot sawt a, semifinal khel tur hmunruak pahnih chu MPL tawp niah a chiang dawn chauh a, beiseina nei club panga ngawt an la awm.

Police nge nge

Mizoram Police-in semifinal lut turin chak an mamawh a, an duh ang result hmu lo mah se Chanmari laka goal hnih ngawta an hnufual hnua an thawhchhuah leh avangin fak ngei an phu. League winner beiseina nei Chanmariin minute hnih chhung lekin Amosa Lalnundanga leh PC Rosangzuala te hmangin goal hnih an khung a, minute 17-na lekah 2-0 in hma an hruai.

Halftime-ah Police an infuih ṭha a, Malsawmfela hnathawh ṭhat vangin Chanmari midfielder Emanuel Lalhruaizela'n anmahni lamah a tilut a, minute 85-naah Lalhmunmawia'n siphurh sutna goal a tauh lut leh bawk. Police-in point khat hlu tak an hlawhchhuah avangin an match tawp bera 1-0 a an chak loh pawhin semifinal an lut ang.

Chanmari erawh kim loa an khelh hnuah chak hmel an la hmu lo a, match zawna an khingpuite nen an inhnehtawk avangin league winner nih beiseina a thamral tiin a sawi theih. Chhiar kawp danin la chiang lo mah se Aizawl FC-in league winner nomawi an chawi dawn.

Comeback ropui chu

Police comeback a ropui a, Ramhlun Athletic comeback a la ropui zawk. Danny Lalduhawma hoten Bethlehem 4-3 a an hneh avangin semifinal beiseina an neih phah. Nimin tlai inkhelah table mawngphaha awm Bethlehemin Laldintluanga leh Vanlalmalsawmdawngkima te hmangin 2-0 in an hma an hruai a, Ramhlun tan semifinal beiseina a chau hman hle.

Mahse, Benjamin Lalnunpuia'n siphurh a sut ṭhen hnuah Lalnunmawia'n goal hnih a khung a, 3-2 in Ramhlunin minute 83-naah hma an hruai ta zawk. Danny-a hote an chak mai dawn emaw tih laiin Kiran Chhetri-a'n Bethlehem tan minute 89-naah mawi zetin siphurh a sut a, Ramhlun semifinal beiseina a tawpah a ngaih theih.

Minute ruk hun pek belh a ni a, injury time minute khatnaah Isak Vanlalpeka'n kawh zetin goal kilah a pet lut a, goal ṭha bik hi Ramhlun chakna goal a nih bakah semifinal beiseina petu a ni.

Danny hote hian Police goal hniha an hneh theih chuan semifinal an lut dawn. Chutihrualin pasarihnaa awm Chawnpui tan pawh beiseina tlem a la awm. Lalrindika Hmar hote hian head to head-ah Ramhlun hneh lo mah se SYS FC leh Sihphir Venghlun te an inhnehtawk a, Aizawl FC an hneh theih chuan semifinal an lut thei ang.