Aizawl FC dal tumtu Sihphir Venghlun

LZ Juice MPL11-ah vawiin chhun dar 12:00 hian Aizawl FC leh Sihphir Venghlun te an inhmachhawn dawn a, inkhel pawimawh bik a ni. I League club tan league champion ni turin chak a ṭul a, Sihphir Venghlun tan semifinal khel turin point hmuh a pawimawh ve bawk.

Ramhlun fuihna

Aizawl FC hian hneh loh an la tawng lo a, season ṭantirha an la kim hmain Chawnpui FC nen an inhnehtawk a, an elpui Chanmari FC nen vawi hnih an inhnehtawk tawh bawk. I League club hi an kaltluang a, an khingpui apiang an hneh ta vek emaw tih mai tur an ni a, mahse match hnuhnung berah Ramhlun Athletic-in an chelh.

Sihphir Venghlun hian Aizawl FC hi an hmachhawn hmasak ṭumin 6-1 ngawtin hneh lo mah se Ramhlun hian beiseina an siam ang. Robert Laldinthara hote hian an match hnuhnung bera Bethlehem an hneh zarah palinaah an awm leh tawh a, Aizawl FC laka point hmuh ngei an tum dawn.

Robert Laldinthara chuan, "Semifinal khelh ngei kan tum a, chumi tur chuan Aizawl FC hi kan dan a ngai. I League club hi a rem dan danin kan dang ang a, point kan hlawhchhuah hrim hrim a ṭul a ni," tiin Vanglaini a hrilh.

Sihphir Venghlun hian PC Lalruatsanga kawl tawh lo mah se Lalthanpuia an nei a, Tepuia hian goal sarih zet khung tawhin a inzirchhuahna Aizawl FC laka khung pawh a châk ang.

Record siam tum AFC

Aizawl FC-in league champion nih ngei an tum a, Chanmari FC laka pressure pek nan Sihphir Venghlun laka hnehna chan hi a pawimawh. Coach Victor Lalbiakmawia chuan, "Kuminah chuan I League-in minti buai tawh lo a, kan ṭhat dan ber zelin kan khel. Ramhlun lakah pawh kan ṭhat dan berin khel mah ila, kan defender hnawhchhuah a nih avangin point thum kan hlawh chhuak thei ta lo. Sihphir Venghlun lakah chetsual nawn a thiang tawh lo ang," tiin chak ngei an tum thu a sawi.

MPL season 10 khelh tawhah tlawm loh nei loa league round hmang tluan an la awm ngai lo a, Aizawl FC hian record siam ngei an tum. Victor-a chuan, "League-a pakhatna nih hi a hlu a, hei bakah hian record siam tel kan duh. Hneh loh nei loa season hman tluan kan duh a, kan khelh hmabak match hnih hi chak ve ve kan duh bawk," tiin Vanglaini a hrilh

Aizawl FC hian khelh hma bakah point ruk an hmuh ve ve theih chuan point 34 hmuin season an khar dawn. Chutihrualin MPL season khata point hmu tam ber record erawh an siam thei tawh lo. MPL2-ah Chanmari FC leh MPL3-ah Aizawl FC ten point 35 ve ve, league round-ah an hmu a ni.