Federer-a season a tawp

Roger Federer chu a khup na vangin tun season chhung a inkhel thei tawh dawn lo. Swiss tennis star hian hun rei zawk inkhelh zel a duh a nih chuan tuna inenkawl ṭhat a ṭul thu a sawi.

Kum 34-a upa Federer hi kumin February thla khan a khup a hliam a, zai niin hemi hnu hian a hnungzâng a ti na zui leh bawk. French Open khel thei lo zuiin Wimbledon-ah lo kir leh mah se beisei a phak thei lo a, semifinal-a Milos Rao-nic a hneh loh ṭumin vawi hnih ngawt enkawl a ngai hial.

Grand Slam vawi 17 champion tawh Federer chuan Rio Olympic-a Switzerland aiawha inlan thei lo tur chu pawi a tih thu a sawi bakah, "Season tluana ka inkhel thei tawh lo tur hi tawrh thiam a har," tiin a sawi.

Khawvel mipa tennis player piang tawh zinga ro-pui ber ang hiala an ngaih Federer hian 2008 Beijing Olympic-ah khan double-ah gold medal a dawng a, 2012 London-ah khan final-ah Andy Murray a hneh lo thung. Grand Slam inelnaa sulhnu nei ṭha ber hi Olympic single-ah a la champion lo a, a kum ngaihtuahin he infiamna khawmpui lianah hian gold dawn a beiseiawm tawh lo.

Season thar atan bei-seina a la neih thu sawiin Fe-derer chuan, "Ka doctor chuan hliam nei loa ATP World Tour ka khelh chhunzawm zel duh a nih chuan inenkawl rih turin thurawn min pe a, ka khup bakah ka taksa peng dang pawh dim a ngai. Kum 2017-ah ṭha taka tennis khel thei ngei tura ka lo kir theih ka beisei," tiin a sawi.