All India U19-ah Ramsanga a ropui

Yonex-Sunrise 31st Smt Krishna Khaitan All India Junior (Under-19) Ranking Badminton Tournament 2024-ah Mizo hming a mawi leh ta - C. Lalramsanga chuan mixed doubles-ah champion nomawi a chawi a, Lalrempuii'n doubles-ah bronze medal a hlawh chhuak ve bawk.

India ram pum huapa inelna ngaihhlut hlawh leh ropui, Haryana Badminton Association buatsaiha neih inelna hi September 14 khan neih ṭan niin, September 19, Ningani khan a zo - Ramsanga hi Mizo shuttler zinga national level inelnaa U19 category-a champion thei hmasa ber a ni a, Mizoram badminton tan thawnthu thar a ziak.

A hming Ramsanga

Durtlang rawlthar Ramsanga hi U19 Mixed Doubles category-ah Vishakha Toppo nen ṭang dunin, seeded no 6 an ni. Round of 32-ah Divyansh Agarwal leh Laya Ajith Kumar-te ṭang dun chu 21-11, 21-17 in an hneh a, round of 16-ah Mizo player, Sainunmawia Sailo leh Ishita Negi-te ṭang dun chu 21-10, 21-17 a paltlangin quarterfinal an lut.

Ramsanga te ṭhian dun hian quarterfinal-ah Anjen Chris Baptist leh Anvitha Vijay-te inkawp chu deciding game-ah 11-21, 21-18, 21-18 in an hneh a, semifinal-ah pawh harsatna lian tham tawk loin Divyansh Rawat leh Zenith Abbigail-te inkawp chu 21-19, 21-12 in an hneh leh bawk a ni. Final-ah seeded no 1 Mithileish P. Krishnan leh Manyan Ralhan hmachhawnin, 21-18, 21-14 in an hneh a, India ram champion thar an ni.

Mission Veng BC player Ramsanga hi tun hnaiah a che ṭha hle - Kotak India Junior International Series 2024 leh Yonex-Sunrise India Junior International Grand Prix 2024-ah bronze medal pathum a dawng a. NE Zone Inter-state Badminton Championship 2024-ah U19 Mizoram Boy's team champion puiin, Mizoram Men's team chu final a luhpui bawk.

Rempuii tan bronze

Hmeichhe inelna lamah pawh Mizoram kan ni lo - Lalrempuii chuan Tanoo Chandra nen inkawpin, U19 Girl's Doubles-ah semifinal an thleng a, an paltlang zawh loh avangin bronze-a lungawi erawh an zir a ṭul ta thung. Serchhip tleirawl Rempuii leh a ṭhiannu hian qualifying round aṭangin inelna an hmachhawn a, semifinal an thleng thei.

Round of 32-ah seeded no 3 Deepak Rai Aditi leh Ponnamma BV Vriddhi-te chu 21-15, 21-12 in an hneh a, round of 16-ah pawh harsatna tawk loin Samridhi Bhardwaj leh Saanvi Nautiyal-te ṭang dun chu 21-9, 21-12 in an hneh leh bawk. Quaterfinal-ah seeded no 8 Maheshwari G. leh Brinda Shinde-te inkawp chu straight set bawkin, 21-5, 21-11 in an hneh.

Semifinal-ah erawh Ralte Villa BC player Rempuii leh a ṭhiannu hi seeded no 1 Pragati Parida leh Vishakha Toppo-te inkawp lakah 21-18, 21-18 in an vanduai ta thung - Mizoram Badminton Association chuan Mizoram tihmingṭhatu, Ramsanga leh Rempuii te an lawmpui thu thuchhuah an siam.