Police lakah AFC-in phuba an la

Nimin tlai inkhelah Aizawl FC-in I Day Football final-a an hneh loh Mizoram Police chu 2-1 in an hneh a, LZ Juice MPL11-ah hmahruaitu an ni. I League club hian match 10 aṭangin point 24 an hmu a, Chanmari FC aiin point khatin an hmu tam zawk.

Victor Lalbiakmawia hoten Police nen an inkhel a pawimawh tih an hria a, player pawimawhte a hun takah an che ṭha. Minute sarihna lekah Lalbiakdika thawhṭhat rah sengin Samuel Lalmuanpuia'n AFC goal hmahruai a khung a, 1-0 a ni nghal.

Champhai Zotlang tlangval hian minute 27-naah ama pualin goal a khung a, 'solo goal' ṭha tak a ni. I Day Football top scorer BD-a hian MPL11-ah goal sarih a khung tawh a, Ramhlun Athletic forward Felix Lalruatsanga goal khat chauhin a pha tawh lo.

Aizawl FC tan league champion ni turin Police hneh a pawimawh a, Police tan semifinal khel pha turin chak a pawimawh. Inkhel a pawimawh avangin boruak a sang a, a khat tawkin buaina tenau a chhuak a, referee-in card 14 a phawrh. Aizawl FC player 10-in yellow card an hmu a, Police player paliin an hmu ve bawk.

Hun tawp hma hretin Police-in counter attack aṭangin Michael Lalbiaksanga hmangin a khung a, Tlangmawia rawlthar hi I Day Football best player niin AFC lakah goal hnih khung a, I League club a ngam hle. Inkhelah erawh Aizawl FC an ṭang tluan a, 2-1 in an chak. Police-in point an hlawhchhuah loh vangin semifinal inchuh boruak a nung sawt.