ISL-ah a vawi khat nan

Tun season ISL-a Mizoram player inlan tur 33 zinga Mizoram player pasarih chu a vawi khat nana ISL khel tur an ni a, East Bengal striker David Lalhlansanga, Jamshedpur FC midfielder Lalhriatpuia Chawngthu, Kerala Blasters forward Lalthanmawia Renthlei, Mohammedan SC forward Lalremsanga Fanai, midfielder Jeremy Laldinpuia, defender Vanlalzuidika Chhakchhuak leh NorthEast United midfielder Fredy Chawngthansanga te an ni.

An zingah hian Fredy hi season hmasa khan Highlander squad-ah hian a lo awm tawh a, mahse, ISL match erawh a la khel lo thung - Blasters forward Amawia'n Aizawl FC chhuahsanin South Indian club a zawm a, ISL-ah hming chher a tum dawn.

David, Remsanga leh Zuidika ten I League-ah Mohammedan SC champion puiin, ISL an inpetkai a, Remsanga leh Zuidika an cham laiin David erawh East Bengal lamah a kal thung - David hian Kolkata club tan match li khelin goal hnih a khung leh der tawh a, AIFF Emerging Player of the Year ni lai hian ISL-ah hming chher a tum ang.

Jeremy Laldinpuia'n I League club Aizawl FC leh Real Kashmir tan a lo khel tawh a, season thar atan Mohammedan SC a zawm. Jamshedpur FC midfielder Lalhriatpuia Chawngthu hi club reserve team-a awm sa a ni a, player rinrawl ni phak tur chuan a la tuai deuhin a rinawm.