Hockey uar a nih theih nan hmalak tum

Hockey Mizoram chuan September 6, Zirtawpni khan Hockey Mizoram Office, Tuikhuahtlangah General Body Meeting an nei a, he hunah hian an hmalak dan tur hrang hrang an rel.

Mizoram chhunga District Unit hrang hrang aiawh te kalkhawm hian, 2024-2025 season chhungin mipa leh hmeichhe tan Inter District Hockey Tournament buatsaih an rel a, a hmun atan Muallungthu Hockey Turf Ground a nih theih nan, thuneitu lamin khelmual an peih hman nan hmalak an tum a ni.

Hockey Mizoramin an sawi dan chuan, tunhma lama kalpui a lo nih tawh angin School Games, Mizoram University Sports leh Mizoram Police Meet-ah te hockey game chu telh leh a nih ngei theih nan hmabak an rel bawk.

GB meeting hi Hockey Mizoram president K. Lalthlengliana'n kaihruaiin; Lalrinfela, General Secretary in annual report a pe a, Lalhlimpuii, Fin. Secretary hnen aṭangin financial report ngaihthlak a ni bawk.

GB Meetingah hian Hockey Mizoram Constitution leh Election Bye Laws te enawn ho niin a tul lai te siamṭhata pawm a ni.