Suarez-a'n international football chawlhsan ta

Luis Suarez chuan Uruguay jersey nena a match hnuhnung ber chu Inrinni zing khan a khel a, mittui nen a ram hmangaih em em kawr a hak chu a hlip - ram tan khelmual chhungah a inlan leh tawh ngai lo.

Khawvel striker awm tawh zinga ropui ber pawla tam takin an ngaih, tuna MLS club Inter Miami tana khel mek Suarez-a match hnuhnung berah Uruguay hian World Cup qualifier khelin, Paraguay an hmachhawn a, duhthusamin Suarez an thlah thei ta lo - goal khung an harsat tlat.

Suarez pawhin he inkhel hi bul ṭanin, minute 90 a khel tluan a, Barcelona striker hlui hian tun hma a pha ta bik lo - Suarez hian ram tan match 143 khel hmanin goal 69 ngawt a khung a, ram tana khung hnem ber a ni.

International football-a Uruguay hming chawisangtu zinga chhiar tel tlak a ni a, Copa America 2011 an champion ṭumin player pawimawh a ni. Mahse, kum 37 mi a nih ve tawh avangin Suarez-a'n hahdam taka chawlh hmante a chak ve tawh a, international football a chawlhsan.

Inkhelh zawhah Suarez thlahna hun hman zui a ni a, Inter Miami tana a khelhpui, a ṭhian ṭha Lionel Messi pawhin a hmunah hmanpui thei lo mah se, a ṭhianpa a lawmpuina hi video kaltlangin a thawn a, stadium-ah hian pholan a ni.

Messi chuan, "I football zinkawnga hun pawimawh tak pakhat chu thlah liam a ni ta a, football khawvelah erawh i la cham chhunzawm zel ka beisei," a ti a, a ṭhianpa hi MLS lama la inkhelhpui zel a duh niin a lang.