Belgium chakna De Bruyne

Kevin de Bruyne-a goal hnih khung hmangin Belgium chuan an mikhual Israel chu 3-1 in an hneh, goal khat dang hi Youri Tielemans khung a ni thung.

Belgium leh Israel te hi Hungary ramah entu nei loin an inkhel. A tira ruahman dan chuan Blegium hi mikhual thlengtu tur an ni - mahse Israel leh Gaza buaina avangin Belgium khawpui zingah Israel mikhual duh an awm lo, buaina lian a chhuah hlauhthawnna avangin ram dangah mikhual an thleng ta zawk a ni.

Israel hian Anan Khalaili hmanin goal khat nei ve mah se awmzia a nei phak lo a, kawng tinrenga chungnung zawk Belgium lamin an phu ang ngeiin hnehna an chang.

Zanin dar 12:15-ah Belgium hian France an lenchilh zui leh nghal dawn - France hi Italy laka tlawm hlim an ni a, a zawna tlawm an hreh khawp ang, chak ngei duhna nen mikhual an thlen dawn avangin inkhel a hmuhnawm ang.

Belgium coach Domenico Tedesco chuan, "Israel lakah hnehna hlu tak kan chang a, thil lawmawm a ni. Chutihrualin insiamṭhat ngaihna lai kan la ngah hle, France laka chak tur chuan kan match hmasa aia ṭha zawkin kan khelh a ngai," tiin a sawi.