Hei le, Carsball chu : England an chak nghal

Kum 1966 FIFA World Cup an champion hnua England coach hlawhtling ber Gareth Southgate a chawl a, Lee Carsley hun a inṭan. Three Lions hian Aviva Stadium-ah inkhel thunun chungin mualneitu Republic of Ireland chu Nations League-ah 2-0 in an hneh.

September 7, Inrinni zan inkhelah England tan Declan Rice-a'n goal hmahruai a khung a, goal hnihna khungtu chu Euro 2024 khel tlaka Southgate-a'n a ngaih loh Jack Grealish a ni. Man City midfielder Grealish chet dan avangin Southgate pawhin thutlukna a siam sual tih a pawm thei ang.

Bul ṭantute

Goalkeeper Jordan Pickford-a'n hna ngai a chelh a, Harry Maguire rawn kirin Marc Guehi nen defence laiah an inkawp. England rinrawl ni ṭhin Kyle Walker leh Kieran Trippier te koh an ni tawh lo a, rinlawk ang ngeiin Liverpool right back Trent Alexander-Arnold chu chhawr a ni.

England-in left back an nei ṭha tawk lo, Luke Shaw a la inhliam bawk avangin Chelsea defender Levi Colwill chu mual veilamah an chhawr. Midfield-ah Rice chu Grealish leh Kobbie Mainoo te nen an inkawp.

Tlarhmaah Euro 2024 khel ṭha lo Harry Kane chu hma tawngah a awm a, Bukayo Saka leh Anthony Gordon ten an thlawp. Southgate leh Carsley team-a la ngai reng chu Pickford, Rice, Saka leh Kane ten hmun pawimawh n la chang zel.

Rice leh Grealish

Aviva Stadium-ah England-in passing game nen bul an ṭan a, an ball inpek dak nghal zak lo mah se ball vawrh pawp pawp an tum tawh lo tih a lang. An khel rei tial tial a, Three Lions-in inkhel an thunun chho zel.

Kane-a'n chance ṭha hmasa a hlah a, Alexander-Arnold cross ball chu ṭha tak a ni. Rep of Ireland-in Pickford tan hna an ranw siam a, mahse England-in na taka vaw letin Gordon-a'n chance ṭha hmasa hlah mah se minute 11-naah Newcastle winger pek chu Rice-a zawnah tla fuhin, kawh zetin a pet lut.

Minute 26-naah Rice ball pek chu Grealish-a'n box chhung aṭangin lei hrulin goal kilah a pet lut a, Man City midfielder theihna sanzia a lang. Second half-ah Saka a hmuhnawm a, Arsenal forward hi goal hmaah a vannei lo.

Bench aṭanga lut Jarrod Bowen leh Eberechi Eze ten goal khung theihna remchang an nei ve ve a, goal an khung thei bik lo. England tan bench aṭangin Manchester United academy chhuak Angel Gomes pawh a lut.

Carsball chu

England hian mikhualna hmunah passing game an khel ngam a, inkhel a tawp meuh chuan vawi 713 pass an nei a, Republic of Ireland ball pass zat vawi 203 nen chuan a inthlau hle.

Three Lions hian 77% ball possession an nei a, Rep of Ireland laka player-te khelh danah Carsley a lawm ang. England coach Carsley chuan, "Ka game plan ṭhat vang lam ni loin ka player-te hian hun chep karah pawh ṭha takin ball an keng thei a, an pet thei a, chuvangin player-ten fak an phu," tiin a sawi.

England-in an khelh dan hmang an thlak a, chak tum ngawr ngawr ni loin game mawi khel chungin chak an tum tawh niin a lang. Hei vang hian England team hian faktu pawh an ngah a, chutihrualin Nations League B-ah an awm tih hriat a ṭha a, team ṭha ber an hmachhawn dawn lo.

Three Lions hi Ireland bakah Greece leh Finland te nen group khatah an awm ho. September 10, Thawhlehni zan hian Wembley Stadium-ah Finland an mikhual dawn a, ṭawiawmtu an nei ṭha khawp ang. Finland hian an match hmasa berah Greece 3-0 in an hneh lo.