Subroto Cup-ah Mizoram an tla

Subroto Cup vawi 63-na junior boys (Under 17) quarterfinal-ah Mizoramin Sri Lanka 2-1 in an hneh lo a, an tla. Inrinni inkhelah hian Sri Lanka tan Aman leh Humaid ten goal an khung a, Mizoram tana Isak Lalmalsawma goal khung a tawk zo lo.

India rama school inelna ngaihhlut Subroto Cup hi ram pawn team sawm luh an nih hnuah Subroto Cup International Tournament tih a ni a, tun ṭumah pawh Bangladesh leh Sri Lanka aṭangin team an tel.

Mizoram hi group B-ah Gujarat (11-0), Punjab (7-1), Bangladesh (1-0) leh NVS (3-0) te nen an ho a, an chak vek. Match li an khelh aṭangin goal 22 an khung a, goal khat chauh an chhuah.

Group stage-ah Mizoramin ram pawn aṭanga chahluh Bangladesh an hneh a, quaterfinal-ah Sri Lanka an hmachhawn lehnghal vangin an vanduai. Chutihrualin team pahnih te hi an inkhel tawk a, first half-ah goal a lut lo.

Mahse, Sri Lanka-in 52-naah Aman hmangin an khung a, Mizoram an talbuai. Box chhunga Mizo defender-te an che ṭha tawk lo a, ball an pet chhuah mai loh avangin minute 55-naah Humaid hmangin Sri Lanka-in an khung belh. Mizoram hian goal hnih an chhuah hnuah nawr na mah se goal an khung lawk thei lo. Injury time-ah Sihphir rawlthar Isak hmangin siphurh an sut ṭhen a, goal dang khung belhna hun a awm tawh lo.