Delhi-in Mizoram an lehthal

Sub Junior Boys' National Football Championship 2024-25-ah Mizoramin Inrinni khan Delhi an hmachhawn a; C. Lalhmingropuia leh Abraham Malsawmhlua te goal hmangin first half-ah 2-0 in hma hruai mah se Delhi-in second half-ah 5-2 in an lehthal.

Bangalore Stadium-a inkhelah Mizoram hi pumruaah te zawk mah se anmahni aia lian Delhi an el pha a, goal an khung hmasa zawk. Minute 16-naah Champhai naupang C. Hmingropuia'n freekick aṭangin mawi zetin a pet lut. Minute 33-naah Kulikawn naupang Abraham-a'n box pawn aṭanga lalutin Mizoram goal hnihna a khung.

Second half-ah Delhi-in an lenna an hmang ṭangkai a; Taibang Nganba-a'n rang taka goal hnih a khung hnuah hattrick a siam zui a, Ansh Raj Singh leh Macdonnish Ngairangbam ten hun tawp dawnah n khung belh. Hun a tawp meuh chuan Delhi 5-2 in an chak.

Mizoram hi group C-ah Delhi bakah Meghalaya leh Odisha te nen an awm ho. Meghalaya hian inelna hmun Bangalore an thlen hnuah TW3 (X Ray hmanga ruh puitlin dan enna) an hmachhawn chauh a, player paih an tam avangin inelna hmachhawn thei loin an haw.

Mizoram erawhin Bangalore pan hmain Aizawlah TW3 test hi an nei a, hun rei tak training camp nei tawh zing aṭangin player 10 an tel thei lo a, chawpchilh takin player 10 lakbelh an ni a, an ṭhat dan berin an khel thei ta lo.

Player thlanchhuahte hi Naupang League khel an ni a, document fel fai tak nei vek an nih avangin TW3 test result hi team enkawltute lamin awm thiam harsa an ti a, chutihrualin chhuanlam atan hman an tum lo. Mizoram coach Lalrindika chuan, "Kan player-te hnena ka sawi leh keimah ka in zirna tura ka ngaih chu Mizo tan chuan mahni aia lian/physical zawk khel tur a ka/kan in zir a ngai tih hi a ni," tiin Vanglaini a hrilh.

Group khat aṭangin team khat chauh luh tur a nih avangin Mizoram tan semifinal luh theihna kawng a inhawng zim tawh hle. Vawiin chawhnu dar 1:00 hian Odisha nen Bangalore Football Stadium-ah group match hnuhnung ber an khel ang.