Germany 'thar' an mawi

Euro 2024 zawhah Toni Kroos, Thomas Muller, Manuel Neuer leh Ilkay Gundogan ten ram tana inkhelh chawlhsan mah se Germany an buai phah lo - Hungary 5-0 in an sawp. Chutihrualin Julian Nagelsmann-a hoten player ṭha leh danglam bikte tel loin match khat chauh la khel tih hriat a ṭha.

Germany tan hian Niclas Fullkrug, Jamal Musiala, Florian Wirtz, Aleksandar Pavlovic leh Kai Havertz ten goal khat ṭheuh an khung a, goal an chhuah lo. Marc-André ter Stegen-a'n Germany no. 1 goalkeeper a nih hnua a match hmasa ber a ni a, clean sheet-a bul a ṭan hi Barcelona goalkeeper tan chanchin lawmawm a tling.

Dusseldorf-a Germany bul ṭan danah thil danglam tehchiam awm lo a, bul ṭantute hi Euro 2024 khelte tho kha an ni. Minute 27-naah Fullkrug hmangin Germany-in hma an hruai a; Wirtz, David Raum leh Musiala ten ball an inpe kual nalh hle.

Germany goal bawh a na a, Havertz-a'n crossbar a tauh per. Hemi hnu hian goal hmasa ber siamsaktu Musiala-a'n ama pualin minute 57-naah goal a khung a, Wirtz-a ball pek chu Germany no. 10 hian um lutin a pet goal.

Minute 65-naah Wirtz-a'n goal khung ve leh a, Bayer Leverkusen playmaker theihna sanzia a lang. Germany-in nuamti takin ball an inpe a, minute 77-naah Wirtz leh Musiala te thawhrah sengin substitute Pavlovic-a'n ram tana a goal hmasa ber a khung.

Germany-in goal li an khung hnuah goalkeeper Ter Stegen-a'n save ṭha bik a nei a, hna ngah lo mah se a hna neihchhunah tih tur a ti ṭha hle. Arsenal forward Havertz-a'n minute 81-naah ama penalty hlawhchhuah chu goal-ah a chantir a, Germany 5-0 in an chak.

Nagelsmann-a'n inkhelh hmain Euro 2024 zawha an match hmasa ber a pawimawh thu a sawi a, Nations League-ah 5-0 a an chak nghal avangin an result-ah an lawm ang. Germany hian September 10, Thawhlehni zan dar 12:15 hian Bosnia and Herzegovina 5-2 a sawptu Netherlands an hmachhawn ve leh ang.