Syria hneh ngei kan tum - Lianzuala

International break-ah India-in Intercontinental Cup an khel a, All India Football Federation buatsaih inelna hmachhawn tur hian sawm an nih angin Syria leh Mauritius an lo kal a, Blue Tigers-in beisei ang inkhel an la chhawp thei rih lo.

India hian an match hmasa zawkah Mauritius hmachhawnin, FIFA ranking-a 179-na nen hian 0-0 in an inhnehtawk a, coach thar Manolo Marquez chuan, "Hei aia chhia hian a khelh theih lo ang," ti hial khawpin an khelh dan a sawisel.

Zanin dar 7:30-ah India hian Syria an hmachhawn leh dawn a, match tawp ber a ni tawh dawn - an chak zo lo leh a nih ngat chuan coach thar Manolo-a hnuaia an match hmasa pahnihah chak an nei dawn lo tihna a ni a, Spanish Coach hian hei hi thlentir a duh lo ang.

Syria hian Zirtawpni zan khan Mauritius hmachhawnin an match hmasa ber an khel a, India goal khung theih lohna team lakah hian 2-0 in an chak - Mustafa Abdullatif leh Mahmoud Al-Mawas ten goal khat ve ve an khung a, zaninah India an hneh emaw an draw chuan Intercontinental Cup nomawi an chawi dawn a, India tan chak ngei ngei a ngai dawn thung.

Hneh tumtu LZa

AIFF Player of the Year ni lai Lallianzuala Chhangte chu ṭum dang ang thoin India innghahna a ni leh dawn a, Mumbai City captain thar hian FIFA ranking-a 93-na Syria lakah hian a ṭha thei ang bera khelh a tum thu a sawi.

Lunglei tlangval chuan, "Pathian zarah ka fitness a ṭha a, Syria lakah hian a ṭha thei ang bera khelh ka tum dawn a ni," tiin Vanglaini a hrilh a, Mumbai forward hian Blue Tigers chu hnehna chanpui ngei a tum.

Season hman zawh taka Mumbai tana ISL nomawi chawitu Lianzuala hian season duhawm tak a hmang a, 2022-23 season angin ISL hero of the league ni tawh lo mah se, Sunil Chhetri hnua a hmasa ber ni turin AIFF Player of the Year-ah a zawnin thlan a ni.

Mumbai tan player rinrawl a ni a, Sunil Chhetri hmun ruak luaha India khaipa ni turin LZa tan mawhphurhna lak hun a inṭan - zaninah India hi hnehna a chanpui thei a nih chuan Mizo tlangval hian ngaihsan a hlawh lehzual ang.

Kan ramah ngei!

January 2024-a Asian Cup khelh a nih khan India hi group khatah Syria nen an awm a, Blue Tigers hi 1-0 in an tlawm - India hian Uzbekistan (3-0) leh Australia (2-0) hmachhawn bawkin, chak nei miah loin Asian Cup an mangṭha.

Zaninah an hneh loh zinga mi Syria laka phuba lakna remchang an nei dawn a, Blue Tigers tan hei lo liama hnehna channa hun ṭha a awm chuang lo. LZa chuan, "Mahni khelmuala inkhel tur kan ni tawh dawn a, hnehna chan ngei tumin kan bei ang," tiin Vanglaini a hrilh.

Blue Tigers squad-ah hian Lianzuala bakah Mumbai tana a khelhpui ṭhin, Mohun Bagan player ni ta Lalengmawia Ralte (Apuia), Odisha FC midfielder K. Lalṭhathanga (Puitea) leh Inter Kashi forward Edmund Lalrindika te an awm bawk.

Lianzuala leh Apuia ten hmun pawimawh an chang ṭhin a, Puitea leh Edmund erawh Mauritius lakah pawh an inlan lo. Edmund hian Igor Stimac hnuaiah Blue Tigers jersey a ha tawh a, Puitea hi a inlan a nih chuan India tana a inlan hmasak ber a ni ang.

A hming Lana

Spanish coach Jose Lana enkawl Syria hi team hneh awlsam erawh an ni dawn lo - Lana hi August 2024 khan kum thum chhung an team enkawl turin contract an ziahpui ve chauh a, Spanish coach hian sulhnu hraw hnutchhiah a duh dawn.

Kum 49 mi coach hian senior team-ah tawnhriat la nei tam lo mah se, Spanish second division club Racing de Santander-ah assistant coach a ni tawh a, Spain Under-16, U17 leh U19 te a enkawl vek tawh bawk.

Spain U19 phei chu UEFA European Under-19 Championship 2024-ah champion nomawi a chawipui a, uanpui tham sulhnu a nei. Asian football-ah hming chher chhunzawm a duh ang tih a chiang a, India laka tlawm hi a suangtuahnaah a awm lo ang.

Lana tan Mauritius kha fiahna a tling lo a nih pawhin Hyderabad khawpuia India hmachhawn erawh fiahna tia chhal ngam zingah a tel a, Lana enkawl Syria hmachhawn hi India pawhin an châk ang.

Syria an ṭha

Chhetri a awm tak loh avangin India-in tlarhmaa mal tlat tur player ṭha an nei lo a, Mauritius laka an khelh dan en chuan Syria laka beisei tihsan zawk chu har tak a ni - Syria hian Europe-a inkhel player pawh an kawl nual.

Kum 20 mi midfielder Mustafa Abdullatif hi German second division club Hannover 96 reserve tana khel mek a ni a, midfielder dang - Danish top flight Randers tana khel Noah Shamoun, Swedish top flight club IF Brommapojkarna tana khel Daleho Irandust leh Swedish second division club Skovde AIK-a khel Elmar Abraham te an kawl bawk.

Defender Emiliano Amor hi Chilean top club Colo-Colo tana khel a ni a, Centre back Aiham Ousou pawh Belgian Pro League club Charleroi tana khel a ni - centre back leh defensive midfield-a khel kawp thei Thaer Krouma hi LZa te nena Mumbai City-a khel ho a ni a, Saudi Pro League thlengin tawnhriat a nei.

Tlarhmaa Pablo Sabbag hi Peruvian club Alianza Lima tana khel lai niin, Colombia-a piang, Syrian mi a ni - Syria player tam zawk hi an ram pawna inkhel an ni a, sulhnu leh tawnhriat an neih ṭhat hlawm avangin India tan a awlsam lo ang.