Chanmari chakna Vincent-a hattrick

I League 3 khelh mekah playoff khel turin Chanmari FC dinhmun a ṭha ta hle - Mizo club hian match hnih an khelhah vawi hnih hnehna changin, playoff khel tura an inpetkai ngei a rinawm ta.

Inrinni zan khan I League 3 match-ah Chanmari hian Chhattisgarh champion RKM Football Academy chu 6-0 ngawtin an sawp a, group C hmahruaitu dinhmun an luah chhunzawm bawk.

Mizo club tan Vincent Lalduhawma chu 'hero' a ni a, hattrick a siam - Vincent bakah hian Joseph Lalvenhima, Lalrinchhana Tochhawng leh MS Dawngliana ten goal khat ṭheuh an khung a, RKM lamin a chhanletna tur an neih loh avangin Mizo club an chak chiang hle.

Buai ve lo

Chanmariin MPL an khelh tel a ṭul avangin squad an siksawi fo a ṭul a, mahse, hun harsaah coach Lalsangzuala Hmar leh a naute an talbuai lo - an match hmasa berah Coramandal FC chu 3-1 ngawta an hneh hnuin, MPL-ah I League club Aizawl FC an hmachhawn zui.

Sanga'n player 10 ngawt thlak danglam chungin Aizawl FC a hmachhawn a, I League club nen 1-1 in an inhnehtawk - darkar 20 chhungin match hnih an khel a, Chanmari tan fixture a hautak tih loh rual a ni lo.

Inrinni zanah pawh Chanmariin goal khung turin hun an mamawh rei lo - first half minute 10 chhungin goal hnih an khung der a, Vincent leh Joseph ten goal khat ve ve an khung.

Hattrick hero

Second half-ah Mizo club an hmuhnawm lehzual sawt a, goal li ngawt an khung belh - Coramandal laka khel ṭha zet Vincent-a'n minute 48-na leh 50-naah khung belhin, hattrick a siam fel der.

RKM tan thawhleh ngaihna a awm tawh lo tiin a sawi theih a, Chanmariin an khung chhunzawm - Vincent-a'n hattrick a siam aṭanga minute hnihna lekah Rinchhana'n goal lina a khung a, Dawngtea'n goal khung loh bik duh loin, minute 56-naah a hnu a khar.

RG Stadium-a inkhelah awlsam takin Chanmari an chak a, playoff beiseina a san sawt laiin RKM erawh an zinkawng a tawp - match hnih khelh tur la nei mah se, match thum an khelh tawhah an la tlawm vek a, playoff an lut thei tawh lo.

Zinkawng hmabak

Chanmariin match hnihah hnehna an chan avangin playoff beiseina a sang - chutihrual chuan Mizo club hian group C-a team ṭha pahnih MYJ-GMSC leh HAL SC an la hmachhawn lo tih hriat a ṭha.

GMSC leh HAL hi inhmachhawn tawhin, 1-1 in an inhnehtawk a, point li ve ve an nei mek - Inrinni veka inkhelah GMSC hian Coramandal chu 4-0 ngawtin an sawp a, Himanshu Patil chuan penalty nen goal hnih khungin, Shanon Pereira leh Vidipt Dua ten goal khat ve ve an khung.

Club ṭha pahnihin playoff luh beiseina an la nei ve ve a, Chanmari FC an la hmachhawn ve ve dawn bawk si avangin Mizo club tan tawlhthluk theih a ni a, fimkhur a ṭul dawn.