US Open hmeichhe champion thar Sabalenka
A hun hmasa lama hlawhtling nghal lo mah se dawhthei takin a nghak a, a tum ram thlen tumin thapui a thawh bawk - Aryna Sabalenka chuan Jessica Pegula hnehin a vawi khat nan US Open nomawi a chawi ta.
Inrinni zan final hmuhnawmah, seeded pahnihna Sabalenka hian darkar khat leh minute 53 chhungin seeded parukna Pegula hi 7-5, 7-5 in a hneh a, nikuma a vanduai tawhna hmunah ngei hnehna a chang ta a ni.
Season hmasa khan Sabalenka hian final a lut, mahse nomawi inchuhna inkhelah Coco Gauff a hneh lo. Mipui hmuh laiin a thinrim insum thei mah se, inthlakna (locker room) hmunah a racquet a vaw chhia.
A chak lohna kha na a ti hle a, tun hma aia ropui zawka thawh chhuah ngei pawh a tum - thla 12 a liam a, a tum ang ngeiin New York khawpuiah chuan ropui taka ngamtu a ni thei ta a ni.
Belarus nula hian Grand Slam nomawi pathum a neih tlinna a ni ta chiah bawk - US Open hmain tun season tir lam khan Australian Open title chu a vawi hnih nan a lo la tawh bawk.
Hard court lalnu
Tennis an khelhna hmun hrang hrang a inang lo, player tin pawh an khelh dan kalhmang a danglam deuh ṭhin. Hard court, clay court leh grass court-ah hian ball kal dan a danglam vek, hei vang hian mahni insiamrem thiam a ngai ṭhin.
US Open leh Australian Open te hi hard court-a khelh a ni, an inkhelhna hmun hi Sabalenka tan chuan hmun duhthusam a ni. Heng inelna lian pahnihah hian a zawnin match 14 chhung chu tlawm loin a kaltluang mek.
Kum 26 mi Sabalenka chuan, "Duhthusam leh suangtuahna ka nei ṭhin a, chumi ti hlawhtling tur chuan theihtawp pawh ka chhuah ṭhin, chutiang zawng zawng hnua US Open champion nih chu a hlu takzet.
"Keimah chauha hlawhtling erawh ka ni bik lo, nomawi ka chawi theih nan hian ka team lamin min thlawp ṭha em em a, tun dinhmun ka thlen theih chhan pawh an ni," a ti a, tournament a khelh danah a lungawi hle.
Sabalenka hi awlsam taka chak erawh a ni bik lo - set hnihna an khelh lai phei chuan 5-3 in a hniam zawk hman a, a tawpah erawh set latu zawkah ṭang letin, set hloh loin final match bik chu a khel tluan thei.
A champion avangin Sabalenka hian world ranking point 2000 a hmuh belh dawn a, a chunga awm Iga Swiatek nen an inkar a zim tawh hle ang. Nomawi bakah hian Rs 30,23,56,260 (£3.04m) a hlawh chhuak nghal bawk.
Kir lehna
Final khelhna Arthur Ashe Stadium hi khawvela tennis stadium lian ber niin New York khawpuia awm a ni, tournament an khelhna hmun hi pian leh murna hmun a ni a, ṭantu a ngah dawn tih chu thil chiangsa a ni.
Season hmasa khan American mipui ten Gauff chu nasa takin an thlawp a, a champion phah hial tia sawi theih pawh a ni - New York a nih miau avangin tennis ngainatu US mi ten tualchhung player an ṭan hi a nih dan tur zawk a ni bawk.
A hmuna entu mipui 23,000 hmaah Sabalenka hian duhthusam ang thlapa ṭha chuan a khel chhuak bik lo, unforced errors pawh vawi 34 neiin, service tihsual nawn vanga point hloh ṭum nga a nei bawk a ni.
Amaherawhchu, a beidawng duh lo - ama service vawi li lai hloh mah se a khingpui service chhuhsak theihna remchang vawi 15 a hmuh zinga panga a ti hlawhtling thei, a bik takin set hnihnaa a thawh chhuah dan chuan fak a hlawh.
Sabalenka tan tun ṭuma a hlawhtlinna hi a lawmawm zual ang - Australian Open nomawi a chawi hnuah hliam vangin a buai, clay court inelna lian French Open khelh dawnah pum lam harsatna a nei a, dar (shoulder) hliam vangin Wimbledon a khel thei lo bawk.
Tunah erawh a hliam a dam kim a, a duh ang taka khelin nomawi a chawi. Angelique Kerber (2016) hnuah chuan, hmeichhe tennis player zingah season khat chhunga Australian Open leh US Open nomawi la kawp leh thei hmasa a ni hial.
Pegula thamral
Kum 30 mi a ni tawh a, tawnhriat ngah viau tawh mah se Pegula tan Grand Slam final hmasa ber a ni a, thlawptu nei ṭha viau mah se a vanneih ṭum a ni lo, engtikah nge major tournament final a khelh leh ang tih chu hunin a hril chauh tawh ang.
Sabalenka ang thoin Pegula hian US Open inbuatsaihna a nei ṭha - Grand Slam dawta inelna ngaihhlut Masters 1000 inelna Cincinnati Masetrs-ah final a lut a, mahse Sabalenka hi a ngam lo, a hmain Canadian Open nomawi a chawi thung a ni.
American nula Pegula chuan, "Hmanni lawkah khan Cincinnati Masters-ah match hautak zet mai kan lo khel dun tawh a, khami ṭum pawh khan set la lo mah ila a hautak hle, tun ṭumah pawh thawnthu a la danglam chuang rih lo.
"Kan intawn tawhna hnuhnung pahnih ka chhut let a, set khat tal chu lak phu khawp chuan ka khelin ka hria. Amaherawhchu, khawvela player ṭha berte zinga mi nen kan inhmachhawn a ni a, set khat chauh lak pawh a awlsam lo a ni," tiin a sawi.
Sabalenka hian service pawh a nei ṭha pangngai viau a, thahrui a nei tel bawk. Mahse, a dinhmun siamṭhat theihna tur remchang a chhawr thei tlat ṭhin lo, a bikin inelna lianah chuan boruak a danglam ṭhin, point khat lek hmuh belh ṭangkai laia chet fuh a pawimawh.
Chak lo mah se Pegula tan major title beiseina a bo ta vek tihna erawh a la ni bik lo, tun season a khelh dan thlir chuan theihna sang tak a nei, rilru paukhauh leh huaisen zawk nen season thar a hmachhawn theih a nih chuan atan kawng a inhawng ang.