Pro Fight ṭan hun tur a chiang

Tualchhung boxing inelna lian LPS Pro Fight chu kuminah neih a ni leh dawn - October 28 aṭangin LPS Arena, Falkland Vengah neih ṭan leh tur a ni ang.

Pro Fight chairman Lalsawmliana Pachuau hoin inelna buatsaihtu tur te chu Nilaini khan Zarkawtah an ṭhu khawm a, inelna hmachhawn tur zat la sawi thei chiah lo mah se nikuma tel (boxer 281) aiin tel an tam ngei an beisei tih an sawi.

Mizoram chhung leh pawn aṭangin kum 17 aṭanga kum 40 inkar a duh apiang, mahni in sengso in an tel thei dawn. September 23 aṭanga October 19 thlengin LPS Office, Zarkawtah entry form lak chhuaha thehluh theih a ni ang.

October 23-ah boxer hriselna endikin an inbuk ang a, October 26-ah fixture tichhuakin ni hnih hnuah LPS Arena-ah inhnek an ṭan dawn a ni.

Nikum ang bawkin flyweight (kg 48-52), bantamweight (kg 52-56), lightweight (kg 56-61), welterweight (kg 61-67) leh middleweight (kg 67-74)-ah boxer-ten title an inchuh dawn a. Kum kal ta khan fly-ah boxer 108 telin an tam ber a, an tlemna ber middle-ah 14 an inlan.

Weight tina champion-in kawnghren leh Rs 60,000; pahnihnain Rs 30,000; semifinal-a chak loin Rs 10,000 leh quarterfinal-a chak loin Rs 5,000 an dawng dawn a. Mimal chawimawina tel loin lawmman pawisa fai Rs 6,50,000 sem chhuah a ni ang.

Champion laite duhthlan tur siamsak an ni a, an awmna weight-ah dinhmun ṭha seed pek ni chungin an khel chho thei a, an duh chuan anmahni cho tur lo nghakin Title Fight-ah chauh an inlan thei bawk a, Title Fight bik hi khawvel huapa professional boxing chhinchhiahna boxrec-ah ziah luh tura ruahman a ni.