Marseille-ah Greenwood a hlim

Manchester United aṭanga Marseille pantu Mason Greenwood-a'n Ligue 1-ah duhawm takin season bul a ṭan a, English striker hian theihtawp chhuah chhunzawm zel a tum thu social media lamah a tarlang.

Kum 22 mi Greenwood hian United-a a hming chhiat hnuah season hmasa kha La Liga club Getafe-ah loan-in a khel a, match 36-ah goal 10 a khung. Tun season-ah Marseille chu pound maktaduai 27-in a zawm a, a che ṭha lehzual.

Greenwood hian a club thar tan league match thum khel tawhin, goal nga ngawt a khung tawh a, an match hnuhnung berah 3-1 a Toulouse an hnehna inkhelah goal hnih a khung.

English striker chuan, "Goal hnih ka khung a, point thum kan hlawh chhuak bawk. Result lawmawm tak a ni a, theihtawp chhuah zel ang aw," a ti a, Ligue 1 lama a hun hman dan nuam a ti rih hle.

Marseille hian league match thum an khelh tawhah tlawm la nei loin, point sarih an hmu mek a, Paris St-Germain rorelna hmun France-ah coach thar Roberto De Zerbi hoin sulhnu ropui hnutchhiah an tum.

Nipui transfer-ah pawh French club hi an che na a, Premier League aṭangin Neal Maupay (Everton) leh Pierre-Emile Højbjerg (Tottenham Hotspur) aṭangin loan-in an hawh a, player lakluh nan ringawt euro maktaduai 80 chuang an seng tawh.