Italy din thar tumtu Spalletti

European Champion-ship 2024 lama beisei an phak loh hnuah Italy manager Luciano Spalletti chuan insiamṭhat ngei an tum thu a sawi a, inelna lian neih leh hma ngeiin team ṭha zawk din ngei pawh a tum.

Italy hi Euro champion lai ni chungin an inlan a, mahse last 16-ah Switzerland 2-0 in an hneh lo - an zinkawng a tawp hi a mak lo, group stage an khelh lai pawhin vawi khat chiah hnehna an chang ve a ni.

Spalletti chuan, "Euro kha kan thlirlet a nih chuan kan che ṭha tawk lo ngei mai, chuvangin kan hma lam hunah engtiang in nge hma kan sawn theih ang tih chu kan ngaihtuah ngei tur pawh a ni ang.

"Team thar, hmathlir nei, pawn lam boruak sangin a tihbuai loh leh beiseina thar nei din ka tum. Azzurri kawr ha tlak leh chumi tura inpeih, inchhuang taka Italy tana khel thei te an inlan ang," a ti.

Kum 65 mi Spalletti hian Serie A-ah Napoli a champion pui hnuin a chawl zuai a, chumi hnuah Italy a enkawl. September thla hian Nations League an khel dawn, team ṭha France leh Israel te an hmachhawn ang.