Kar ruk chawl tur Ceballos

Real Madrid midfielder Dani Ceballos chuan a ke rekah hliam a tuar a, kar ruk tal a chawlh a ngai dawn - Real Madrid hian Pathianni zan khan league match-ah Real Betis chu 2-0 in an hneh a, he inkhela bul ṭan Ceballos hian second half ṭantirah hliam neiin lakchhuah a ngai.

Kum 28 mi hi Real Madrid chuan a chawlh rih tur thu an puang a, October thla tawp lamah bak Spanish midfielder chu a kir theih an rin loh thu an sawi. Ceballos hi a vanduai ve hrim hrim - Real-ah hmun a chang meuh lo a, season hmasa khan league match ngaah chiah bul a ṭan.

Hemi a nih avang hian Real chhuahsana Real Betis zawm tur anga sawi a ni a, mahse, a insawn ta lo. Tun season-ah pawh UEFA Super Cup match-ah khan bench aṭangin a lut a, Real Valladolid lakah bench aṭangin a lut bawk.

Pathianni zanah tun season-a a vawi khat nan bul a ṭan a, minute 65-naah hliam vanga lakchhuah a ngai - inkhel theia a lo kir leh hunah meuh chuan Krismas ruai ṭheh a hnai kuar tawh ang!