Man United thuneituten Ten Hag a la thlawp

Old Trafford-ah Erik ten Hag-a enkawl Manchester United chu an hmelma Liverpool lakah an mualpho a, dawl zawrin an zawr. Dutch manager Ten Hag ban duhtu ṭhahnem tak awm mah se club thuneituten an la thlawp.

Season liam ta khan Ten Hag-a enkawl United hi league-ah pariatna an ni a, kum 1990 hnua an chet chhiat ber ṭum ni mah se Dutch manager hian a hna la chelh chhunzawm zel. United thuneituten an la rin chhan bera lang chu, FA Cup final-a Man City hneh chunga nomawi an chawi vang a ni.

Tun season-ah match hmasa pathum aṭangin point thum chauh an la hmu a, table-ah 14-naah an awm mekin international break zawhah Southampton an hmachhawn dawn. Saints hi an hneh lo a nih chuan kum 1986-87 hnua an chet chhiat ber a ni ang.

Man United-in season bul ṭan ṭha lo mah se club neitu thar zinga mi Sir Jim Ratcliffe-a'n kalphung thar an duan mekah Ten Hag chungah rinna a la nghat a, Liverpool an hmachhawn hmain chief executive Omar Berrada leh sporting director Dan Ashworth ten a thlawp thu an sawi bawk.

United-a thuneitu lian pahnih Berrada leh Ashworth te hian thuneihna an chelh hmain club-in season liam taa Ten Hag-a chet dan an lo zir ho tawh a, team enkawl zel turin thutlukna an siam tawh thung.

Berrada chuan, "Club kan zawm hmain thutlukna an siam tawh a, an thutluknaah kan lawm. Erik hian keimahni aṭanga thlawpna 100% a nei a, kan team enkawl turin kan ring tawk. Nipui bazar lain kan thawk ho a, result ṭha kan neih theih nan kan thawk ho zel ang," tiin a sawi.

Ashworth hian kum 2019 khan Brighton & Hove Albion-ah technical director hna a chelh tawh a, club-a thuneitu a chelh aṭanga thla thumnaah manager Chris Hughton an ban. Chutihrualin thla 19 chhung Newcastle United-a thuneitu hna a chelh chhungin Eddie Howe chiah manager atan a hrawn thung.

United sporting director Ashworth chuan, "Kar riat chhung Erik nen kan thawk dun tawh a, thawhpui nuam ka ti hle. Ka hna chu Man United hlawhtlinna tura amah hi kawng hrang hranga thlawp a ni," tiin a sawi.

Tun nipui bazarah Man United-in player lut leh chhuak an ngah a, neitu thar Sir Jim Ratcliffe hnuaiah hmasawn ngei an tum niin a lang. An player chhuahtir zingah season liam taa first team tana khel Raphael Varane, Anthony Martial, Aaron Wan Bissaka, Scott McTominay, Facundo Pellistri leh Willy Kambwala te an tel.

Squad tichak thei tura ngaih player panga Joshua Zirkzee, Leny Yoro, Matthijs de Ligt, Noussair Mazraoui leh Manuel Ugarte te an lalut. Inelna ṭan hmain defender Yoro leh sriker rinrawl tura ngaih theih Rasmus Hojlund te an inhliam bakah Uruguayan midfielder Ugarte-a'n Liverpool a la hmachahwn hman lo.

Ten Hag-a chhawr theih turin player an la dam kim lo a, hei vang hian result nei ṭha tawk lo mah se United thuneituten Dutch manager chunga rinna an la nghat hi thilmak a ni hran lo.