Arsenal-in Trossard hralh tum lo

Saudi Pro League club Al Ittihad chuan Arsenal forward Leandro Trossard chu lakluh tumin dawr mah se, Gunners hian Saudi club sum mawm an lo hnar a, Belgium international hi Mikel Arteta ruahmannaa a la tel thu an lo hrilh.

Saudi club hian Trossard hi loan-a hawh phawt a, loan-a hawh mana euro maktaduai nga pek an inhuam a, a loan hun a zawhah €20-25mtd pea lakluh nghal an tum - mahse, Arsenal lam chhanna chu, "A theih loh" tih a ni.

Kum 29 mi Trossard hian January 2023 khan Brighton & Hove Albion aṭangin Gunners hi a zawm ve chauh a, a tir lamah beisei angin che ṭha lo mah se, season hmasa khan London club tan inelna hrang hrangah match 46 khela goal 17 khungin, assist vawi hnih a nei.

Arsenal hian tun season-ah league match thum khel tawhin vawi hnih an chak a, vawi khat draw result an nei. Match hmasa berah Wolverhampton Wanderers chu 2-0 in an hneh a, he inkhelah hian Trossard hi bench aṭangin a lut.

Match hnihnaah Aston Villa chu 2-0 in an hneh a, bench aṭang bawka lut lehin goal a khung a, match hnuhnung bera Brighton & Hove Albion nena an inkhelah bench aṭangin a lut thung.