A hun a thlen chuan, ka chawl ve mai ang - Ronaldo

Cristiano Ronaldo-a'n ram tana inkhelh chawlhsan a la tum lo a, Portugal legend hi mipa football-ah ram tana goal khung tam ber leh khel tam ber a ni mek. Kum 39 mi Ronaldo hian match 212 aṭangin goal 130 a khung tawh a ni.

Portugal hian Nations League-ah September 5, Ningani zan hian Croatia an mikhual dawn a; September 8, Thawhṭanni zanah Scotland an hmachhawn leh bawk dawn. Roberto Martínez chuan Ronaldo hi Nations League khel turin a ko.

Al Nassr forward Ronaldo chuan, "A hun a thlen chuan, ka chawl ve mai ang. Thuthlukna harsa tur awm lo. Kan ram tan tih theih nei tawh loa ka inhriat chinah, chawl turin thutlukna ka siam nghal ang," tiin a sawi.

Euro 2024-ah khan Ronaldo hian goal a khung lo a, mi ṭhahnem takin team a ti chhiaah an ngai bawk. Sawiselna nasa tak tawk mah se Ronaldo hian chawlh a tum lo.

Germany-a inelna neih zawh takah khan Ronaldo leh a khelhpui kum 41 mi Pepe te chu kum lama upa pahnih an ni a, inelna neih zawhah Real Madrid defender hlui Pepe-a'n inkhelh chawlhsan.

Euro 2024 zawh khan Portugal international hlui Jose Fonte chuan, "National team aṭanga inhnuhdawh hun an hre ngei ang. Portugal tan tha an thawh hlawk a, sulhnu ṭha tak an hnutchhiah. Chutihrualin player naupang zawkte an ken a hun tawh," tiin a sawi.

Pepe-a'n inkhelh chawlhsan mah se Ronaldo erawhin chawlh mai a la tum lo a, FIFA World Cup thleng pawha khel thei dinhmunah a la ding. Thla liam ta khan Ronaldo chuan, "Ka chawlh hun tur ka hre lo a, kum hnih thum chu te chu la khel thei turah ka ngai.

"Al Nassr-ah ka hun tawp ka hmang ang. Ram tana ka chawlh hun tur erawh tumah ka hrilh lawk dawn lo. Uluk taka ka ngaihtuah hnuah thutlukna ka siam ang," tiin a lo sawi tawh a ni.