A nupuiin Casemiro a chhan

Pathianni zan Premier League inkhelah Manchester United-in 3-0 in mikhual Liverpool an ngam lo a, an goal chhuah pahnih chu midfielder Casemiro tihsual vanga lut niin, Brazilian midfielder hian dem rawn a hlawh hle.

Hetiang boruak karah hian Casemiro nupui Anna Mariana chu a pasal chhanin a ṭawng chhuak a, social media lamah an pa nomawi chawi tawhte a tarlang bawk! Mariana chuan, "Casemiro mi paukhauh tak, thinlung sak tak neitu," tiin instagram lamah a ziak a, nomawi a tarlang tel.

Real Madrid midfielder hlui Casemiro hi a chetsual vangin coach Erik ten Hag pawhin chhan mah se, kum 20 mi player Toby Collyer hmanga second half-a a thlak avangin Dutch coach hian a chhan tak takin a lang lo!

Liverpool defender hlui Jamie Carragher chuan, "Casemiro khelh dan kha en ila, a khawngaihthlak zawk a ni," a ti a, Manchester United legend Gary Neville pawhin, "A inrintawkna a hloh a ni," a ti bawk.

Inkhelh zawhah United boss Ten Hag pawhin Casemiro la chhuak a, a vawi khat nana Collyer a luhtir chhan sawifiahin, "Liverpool kha hneh let kan tum avangin risk kan lak a ngai ve bawk a, midfield-ah khan tlan tam tur player kan mamawh - chuvang chuan Collyer kha kan luhtir a ni.

"Football-ah chuan tumah mawhphurhtu bik kan awm lo a, kan vai mawhphurhna a ni. Casemiro hi player paukhauh tak a ni a, a career-ah nomawi chawi theih zawng zawng chu a chawi - kan team tan pawh a thawhhlawk leh ang tih ka chiang a, hnehna chang ṭhin mi a nih avangin a awm zel ang," a ti.

Kum 32 mi Casemiro hi Brazil tan pawha vawi 75 ngawt inlan thei a ni a, Real Madrid tan 2013-22 inkar kha khelin, Champions League nomawi ringawt pawh vawi nga a chawi tawh - La Liga (3), Copa del Rey (1), Supercopa de Espana (3), UEFA Super Cup (3) leh FIFA Club World Cup (3) ah a champion bawk.