City chhuahsan ka tum lo - KDB

Nipui transfer laia chhuak tur anga thawm nei reng, Manchester City midfielder Kevin de Bruyne chuan transfer laiin eng club mah indawrna a neihpui loh thu a sawi a, Etihad Stadium chhuahsan lam a hawi lo.

Belgian playmaker hian nipui lai khan, City chhuahsan tura sawi a nih lai takin eng pawh thleng thei a nih thu a sawi chhuak a, mahse, tuna thu thar berah chuan eng club mah a dawr loh thu a ni.

KDB chuan, "A nihna tak sawi ila, tumah indawrna ka neihpui lo. Ka chungchangah sawi tam tak a awm a, media lamah pawh a tam hle. Mahse, nipui lai khan hahdam taka hun hman ka duh thu ka sawi a, ka sawi ang ngeiin ka hmang.

"Kar li zet chawlh ka hmang a, ka lo kir a, training ka zawm. Chu zawng chu ka nipui chawlh hman dan a ni a, thil thleng dang a awm lo. Eng club mahin min be lo a, tumah ka be lo bawk," a ti.

De Bruyne hian kum 2015 khan German club Wolfsburg aṭangin City hi a zawm a, hetihlai hian Pep Guardiola chu City boss la ni lo mah se, Spanish coach-in Eithad Stadium a pan hnuah pawh player pawimawh a nih chhunzawm.

KDB hian City-ah kum khat cham turin contract a la nei mek a, Manchester khaw club nen hian a hma hun chungchangah an indawr a beisei thu a sawi. Kum 33 mi midfielder chuan, "Season hi han kal zel se, City nen indawrna kan neih ngei a ṭul ang.

"Tunah chuan nuam ti taka inkhelh hi ka duh a, tun dinhmunah chuan thil dang ngaihtuaha hmanhmawh a ngai pawhin ka hre lo," a ti a, inbiak a beisei thu sawi mah se, a hmanhmawh lo niin a lang.

KDB hian City tan nomawi chawi theih ang chu a chawi kim - Premier League nomawi paruk, FA Cup (2), League Cup (5) leh Champions League (1) nomawi a chawi tawh a, City tan inelna hrang hrangah match 386 khela goal 103 khung tawhin assist vawi 171 a nei tawh.