Quarterfinal-ah Swiatek a lut

Iga Swiatek chuan US Open nomawi chawi a tum ruh hle a, a hma a ding apiang a hneh zel - Polish star hian nimin zing khan Liudmila Samsonova a hneh, harsa lutuk loin quarterfinal a lut a ni.

New York khawpuia tennis stadium hmingthang ber mai Arthur Ashe Stadium-ah Swiatek hi a inlan a, darkar khat leh a chanve chhungin a khingpui Samsonova hi 6-4, 6-1 in a hneh.

Kum 23 mi Swiatek hian Grand Slam match vawi 100 a khel tling ta chiah a, inelna lian hoah hian match 83 chu chakin ṭum 17 chu a chak lo lamah a ṭang thung a ni.

World number 1 Swiatek hian tun season US Open a khelh tawh chinah hian set a la hloh miah lo, kum 2022 khan Flushing Meadows-ah hian quarterfinal a lo lut tawh bawk a, hemi ṭum hian a champion.

Grand Slam vawi nga champion tawh Swiatek chuan, "Match tir lamah kha chuan mipa inkhel ang mai kan ni, mahni service kan hum ṭhain remchang kha kan insiamsak duh lo a ni ber mai.

"Zawimuangin inkhel ka thunun hret hret a, set khatna harsa angreng taka ka lak hnu kha chuan ka tan kawng a awlsam phah ta deuh, inkhel pumpui thlir chuan ka ti ṭha hleah ka ngai," tiin a khelh danah a lungawi tih a sawi chhuak.

Tun season kal laiah Swiatek hi match 57 a chak tling tawh a, nomawi panga a chawi tawh bawk - heng zingah hian a vawi li nana French Open 2024 title a lak pawh a tel a ni.

Swiatek hian quarterfinal-ah chuan Jessica Pegula a hmachhawn leh dawn - seeded parukna Pegula hian inkhel dangah Russian nula Diana Shnaider chu 6-4, 6-2 in a lo hneh ve bawk.

Pegula hian Grand Slam quarterfinal hi vawi sarih a lut tawh a, tun hmain hei baka thui a la thleng ngai lo. A dai ngai loh ram dai tur chuan player ṭha Swiatek a paltlang a ngai dawn tihna a ni.

American nula, kum 30 mi Pegula chuan, "Tun hmain Grand Slam quarterfinal ka la kalpel ngai lo, tun ṭumah hian ka taksa mai bakah ka rilru put hmang chu fiahin a awm dawn.

"Kumin chu a tir aṭangin fiahna hrang hrang ka hmachhawn hnem a, hei vang hian ka rilru pawh a paukhuah tawk viauin ka hria, chona hautak hmachhawn turin ka inpeih," tiin a sawi.

Hmeichhe singles huangah hian Karolina Muchova pawhin quarterfinal a lut, seeded pawh ni phak lo zinga mi Muchova hian seeded pangana Jasmine Paolini chu 6-3, 6-3 in a hneh.

Muchova hian US Open 2023 khan semifinal a lo lut tawh, tun ṭumah pawh hian inrintawkna sang tak nen inelna a hmachhawn thei a, set khatnaah 3-1 in hniam zawk hman mah se a tho chhuak thei a ni.

Kum 28 mi Paolini erawhin kumina Grand Slam a khelh ṭhat a chhawmnung thei ta lo, inelna lian pahnih French Open leh Wimbledon-ah te khan final a lo thleng tawh a, tun ṭumah erawh a service ṭha takin a chhan zo ta lo.

A vawi ruk nana Grand Slam quarterfinal khel tur Muchova hian Beatriz Haddad Maia a hmachhawn leh ang, seeded 22-na Maia-i hian world number 1 hlui Caroline Wozniacki chu 6-2, 3-6, 6-3 in a lo hneh ve bawk.