Sinner hmachhawn tur Medvedev

Mipa tennis world number 1 Jannik Sinner leh Daniil Medvedev te chu US Open quarterfinal-ah an inhmachhawn dawn, nomawi inchuhna inkhel ang maia hautak leh hmuhnawm a ni ngei ang.

Nimin zing last 16 inkhelah Sinner hian Tommy Paul chu 7-6 (7-3), 7-6 (7-5), 6-1 in a hneh a, set hmasa pahnih harsa deuh mah se a hnuhnung berah erawh game khat chiah hlohin a tlang a ni.

US Open 2021 champion Medvedev chu Thawhṭan zan khan a inlan thung a, a khingpui Nuno Borges chu 6-0, 6-1, 6-3 a hnehin a thiam zual pariat zingah a inhlangkai a, a hmabak erawh a hautak tawh dawn.

Tun season US Open khelh laiah player langsar an chesual nasa, tun dinhmun thlenga la dam zingah chuan Sinner leh Medvedev te chauh hi major title la thei tawh an ni a, pakhat zawk chu kan thlah liam leh a ngai dawn.

Australian Open 2024-ah pawh khan player pahnih hi an lo intawng tawh, set hnih a hloh hmasak hnuah Sinner tho chhuakin nomawi a chawi zui a, tun ṭumah pawh hian inkhel hmuhnawm an chawp chhuak leh ngei tura ngaih a ni.

Nimin zinga Paul-a a hneh hnuah, quarterfinal chungchang chu Sinner an zawt a - Russian tlangval chuan, "Inkhel awlsam a ni dawn lo, rei tak tak chhung ball inpek kual leh ngei pawh a awm ang, chumi tur chuan ka inbuatsaih a ngai dawn.

"Kei chuan ka theihtawp ka chhuah dawn, ka khingpui tur Daniil pawhin thapui a thawh dawn - mipui tana inkhel hmuhnawm leh en manhla tak kan chhawpchhuak ngei ang," tiin a sawi.