Suarez-a'n ram tana inkhelh chawlhsan

Uruguay striker Luis Suarez chuan ram tana inkhelh a chawlhsan thu a puang - South American ram tan hian inelna hrang hrangah match 142 khelin goal 69 a khung, an ram tana goal khung tam ber a ni.

Uruguay hian tun kar tawp hian World Cup qualifier-ah Paraguay an hmachhawn dawn, he inkhel hi kum 37 mi Suarez tan chuan ram tan bika a match hnuhnung ber a ni tawh ang.

Liverpool leh Barcelona striker hlui chuan, "Hetiang hun hi engtikah nge a lo thlen ang tih ka ngaihtuah lawk nasa tawh hle a, tun hi ka tan chuan hun ṭha a ni. Ram tana ka match hnuhnung ber ka khelh zawh hunah chuan hahchawlh ka duh dawn.

"Kum 19 mi chauh ka nih lai aṭangin Uruguay tan ka khel a, tunah chuan kha tih laia rawlthar mai kha senior player a lo ni ta. Kum 2007 a ram tana ka match hmasa ber kha ka theihnghilh tawh ngai lo ang," tiin a sawi.

Suarez hian Uruguay tan tournament lian vawi kua ngawt a khel a, 2010 World Cup khan an ram hi semifinal thlen puiin a hnuah Copa America champion a nih pui bawk.

Club lamah chuan Inter Miami tan a khel mek a, ram tana inkhelh chawlhsan mah se Major League Soccer (MLS) lamah erawh a la inlan chhunzawm dawn a, ram tana a feh chhuah loh erawh chuan chhungkaw tan hun a nei tam ve tawh dawn niin a sawi.