
Mizoram Sub Jr team-in Bengaluru an pan

Mizoram team chuan nimin khan Sub Junior National Football Championship neihna hmun tur Bengaluru panin Aizawl an chhuahsan. Mizoram hi S. Malsawmtluanga (manager) leh K. Lalrindika (coach) ten an ho a ni.
AIFF-in inelna hmachhawn tur hian TW3 (X ray hmanga ruh puitlin dan enna) an hmang a, hun rei tak training camp-a awm tawh Mizo player 10 ngawt thlauh thlak an ngai. Mizoram coach Dika chuan, "Kan player-te hi Naupang League-a mi an ni a, an naupan tet aṭanga kan hriat an nih bakah document fel fai tak an nei vek a, digital birth certificate an nei vek. Thil thlen dan hi mak kan ti a, TW3 hi pawm har kan ti hle," tiin Vanglaini a hrilh.
FSDL Grassroots technical director Richard Hood pawhin, "AIFF-in kum bithliah inelnaa TW3 hi a fuh loin ka hria, senso a san bakah a dik loh theihna a sang bawk si. Mizoram team pawhin an tawrh phah ngei ka ring a, chutihrualin he thil hi Naupang League tehna tur erawh a ni lo.
"Naupang League erawh a kal ngaiin a kal reng a, Mizo naupangten hma an sawn zel ang. Tun season-ah pawh hmasawnna ka hmu a, Sub Junior-a an result hi a tehfung tur ber a ni lo," tiin Vanglaini a hrilh ve bawk.
Mizoram hi Meghalaya, Odisha, Meghalaya leh Delhi te nen group khatah an awm ho a; September 7, Inrinni hian Delhi nen match hmasa ber an khel ang. Mizoram coach Dika chuan, "State dang hi keini anga an kum a dik phawt chuan beiseina an nei sang khawp mai. Player min paihsak avangin kan hnual lo a, chhuanlam siam kan tum lo. Kan player neihte hmang hian theihtawp kan chhuah dawn," tiin a sawi.