Chanmari FC chunga awm tum Aizawl FC

LZ Juice MPL11-ah vawiin tlai dar 3:00 hian table chung bera awm Chanmari FC leh an hnuai chiaha awm Aizawl FC te an inkhel dawn a, MPL inkhel pawimawh bik a ni.

Tun season aṭangin MPL-ah league champion tan nomawi a awm dawn a, chuvangin vawiin tlaia inkhel tur hi league champion zawnna 'final' ti hialin a chhal theih.

AFC an ṭha zawk?

Aizawl FC hi table-ah pahnihnaah awm mah se tun season-ah chuan Chanmari FC aiin an khel ṭha zawk. I League club hian MPL-ah goal 25 an khung tawh a, CFC aiin goal sarihin an khung tam zawk.

Chutihrualin AFC hi Chanmari hnuaia awm an ni a, hei hi a chhan lian ber chu FIFA-in a hrem vang a ni. Aizawl FC-in season liam ta khan foreigner an la a, document buai avangin Aizawl an rawn thleng lo a, Mizo club tan a khel ta lo. Mahse, player hi FIFA-ah a zualko avangin Mizo club-in an tuar a, a hlawh tur ang an pek hnuah player an lalut thei chauh.

MPL11 ṭantirhah Aizawl FC an la kim lo a, Chawnpui FC nen an inhnehtawk avangin I League club-in point hnih an hloh. Hemi hnua hian Victor Lalbiakmawia hote hi che ṭha chhunzawm mah se an elpui ber Chanmari nen an inhnehtawk avangin pahnihah an lungawi a ṭul rih.

Aizawl FC tan a chung bera awm theihna hun ṭha an inher chhuak a, vawiin tlai hian nizana I League 3 khel Chanmari FC an hmachhawn dawn. I League club erawhin hahdamna hun ṭha an nei a, vawiin hi coach Victor-a tan I Day Football final ṭum hniha a hneh tawh loh Lalsangzuala Hmar team enkawl hneh theihna remchang a ni ang.

A hmuhnawm dawn

July 23, Thawhlehni khan team pahnih hi an inkhel tawh a, goal awm loin an inhnehtawk. An intawn hmasak ṭum hi MPL11 leh I Day Football-a game class san ber ṭum a tih theih.

Aizawl FC tan Lalbiakdika rawn let hman hi a chanchin lawmawm a ni a, Champhai Zotlang tlangval hian goal a khung nghal. AFC striker C. Lalhriatpuia tun hnaiah a che ṭha a, vawiinah amah hnar tawhtu Chanmari lakah a theihna lantir a tum ang.

Coach Victor hnuaiah Aizawl FC-in game mawi an khel a, an goal bawh a na tel bawk. Chutihrualin I League club hi an famkim bik lo a, I Day Football final-ah Mizoram Police lakah an chesual a, tun ṭum hi nomawi an thlauh hnua fiahna an tawh lehna hmasa ber tur a ni.

Chanmari coach Lalsangzuala Hmar chuan, "Aizawl FC hi team ṭha an ni a, kan inkhelh tur hi a pawimawh bawk. Bench player ringawt luhtirna tur chu an ni lo a, AFC hneh thei tur team chawr kan duh. Chutihrualin tun dinhmunah chuan engmah a sawi lawk theih loh. Corramandal nena kan inkhel result hian a hril dawn a, player dinhmun hriat hmasak phawt a ngai," tiin Vanglaini a hrilh.

Chanmari hian nizan khan I League 3-ah Andhra Pradesh club Corramandal FC an hmachhawn a, September 7, Inrinni zanah RKM Football Academy an hmachhawn leh chauh dawn. Coach Sanga'n Aizawl FC hmachhawn hunah player ṭha a khelhtir a nih pawhin thilmak a ni lo ang.