Vawiin aṭangin Aizawlah I League 3: Zanin dar 7:00-ah Chanmari Vs Coramandal

Mizoram Premier League-a vawi hnih champion tawh Chanmari FC chuan I League khelh an tum a, India rama league sang ber dawttu khel tura kawng hmasa ber I League 3 chu vawiin aṭangin khelh ṭan a ni dawn.

Chanmari FC hi group C-ah HAL Sports Club (Bangalore), RKM Football Academy (Chhattisgarh), Coramandal FC (Andhra Pradesh) leh MYJ-GMSC (Mumbai) te nen an awm ho. Mizo club hi group C inelna thlengtu an ni a, match li an khelh tur hi zan vekah an khel dawn a, Mizo mipui tan pawh ṭawiawm a nuam ang.

Vawiin tlai dar 2:00 hian HAL leh RKM FA te an inkhel ang a, zanin dar 7:00-ah Chanmari FC leh Coramandal FC te an inkhel dawn. Lalsangzuala Hmar hote hi mahni muala khel tur an nih avangin chak tura rin zawk an ni.

Inelna kalphung

I League 3-ah hian team 25 an awm a, group pangaah team panga zelin an inṭhen. Group tin aṭangin a tiṭha pahnih zelin September thla tawp lamah second phase an khel leh ang.

Group C inelna hi Chanmari FC-in RG Stadium, Mualpuiah a thleng a, group pali dang hi Diamond Harbour FC (Naihati Stadium, Kolkata), Sesa Football Academy (Dempo Academy Ground, Goa), Karbi Anglong Morning Star FC (KASA Stadium, Diphu) leh Downtown Heroes FC (TRC Stadium, Srinagar) ten an thleng thung.

Ṭantu mamawh Chanmari

Chanmari FC president Vanlalruatfamkima (Valpuia) chuan "I League 3 khel turin field chhung leh pawn lamah theihtawp kan chhuah a, kan thawh hona a ṭhain I League khel tur hian kan inpeih tawh. Chanmari FC player-te hi Mizoram hmun hrang hranga mite an ni a, Mizo ten I League club kan neih belh ngei theih nan Mizo mipuite thlawpna kan mamawh takzet a, a hmun ngeiaṭawiawm theuh turin kan sawm a che u," tiin a sawi.

Chanmari hi MPL club pariat zingah Aizawl FC nen chauh season tina MPL khel thei an ni a, Mizoram football tana an thawh hlawk avangin Mizo mipui pawhin ṭawiawm let hi an phu hle. MPL11-ah Chanmari FC hian hneh loh an la tawng lo a, hmahruai mektu an nih avangin group stage paltlang turin an ṭha tawkah a ngaih theih. Chutihrualin Lalsangzuala Hmar hote hian I League 3 leh MPL11 an khelh kawp dawn avangin an hmabak hi hna awlsam a ni dawn lo.

Inbuatsaihna ṭha

Chanmari FC hian match li an khelh tur hi zanah vek an khel dawn a, zana an inkhelh dawn avangin zanah training an nei ṭhin. Hei bakah hian RG Stadium hi MPL khelhna a nih avangin Chanmari player-ten 'home advantage' ṭha tak an nei dawn.

MPL-ah Chanmari tlarhnung a phui ṭha a, goal hnih chauh an la chhuah a, I League 3-ah an chhunzawm theih a ṭul ang. MPL11-ah Chanmariin goal 18 an khung tawh a, player 12-in goal an khung. I League 3-ah MPL11-a goal nga khung tawh MS Dawngliana leh goal thum khung tawh KC Malsawmsanga te an pawimawh a rinawm a, chutihrualin dinhmun ṭhaa an din theih nan phai lama tawnhriat nei ṭha Lalkhawpuimawia chet ṭhat a ṭul ang.