Mizo inchai a hmuhnawm zel

Inter District Wrestling Championship vawi sarihna chu Thawhlehni khan LPS Arena, Falkland Vengah khelh ṭan a ni a, sub-junior inelna zawh fel a ni a, hemi huang bikah hian gold medal panga latu Serchhip an sang ber.

Inelna dang ngaihven hlawhah Mizo palian inchai champion Lalsangliana cho tur zawn a ni. Mi pali tel tura beisei an nih laiin pathum ziah luh an ni a, North Vanlaiphai inchai chak Lalrinchhana Sailo chuan Zokhawthar tlangval Laldinthara a bawhbet.

Nilaini chhun leh zanah neih niin, kum 15 hnuai lam inelna zoin, gold medal 10 an sem chhuak. District pasarih telin Serchhipin gold medal awm zatve bakah silver medal leh bronze medal pahnih ve ve an la.

Kolasibin dawtin gold medal pathum leh bronze medal pakhat an dawng a; pathumnaah championship thlengtu Aizawl an awm a, medal 15 dawng mah se gold medal pahnih chauh telin silver pasarih leh bronze medal paruk an hlawh chhuak.

Zanah Mizo inchai title chuh tur zawnna buatsaih ṭanin thawh thum zel an inbei. Palian inchai hmasa berah thawh hnihna a tawp thlengin point a awm lo a, thawh hnung berah Rinchhana'n vawi 10 chhiar thlengin Dinthara a bawhbet a, chiang takin a chak.

A vawi khat nan title chuh thei turin Rinchhana'n hmabak a nei tam tawh lo. Lunglei tlangval Lalremtluanga nen an innuai leh dawn a, a chak a nih chuan a tlang ang. Kum 33 mi Sangliana hmaa ding tur zawnnaa tel palian pathum an inchai kual vek dawn a ni.

Palaihawl title chuh tumin mi panga an tel ve thung a, Saitual inchai chak Ngursangzuala'n harsa lo takin Ramropuia (Mamit) a hneh a, 10-1-in a hneh. Semifinal-ah Ngura'n Vanlallawma (Muallungthu) a hmachhawn dawn a, lehlamah RB Lalthansanga (Muallungthu) leh Jeho Zonunsanga Ralte (Ailawng) an inchai thung dawn a ni.

Patê title chuh tumin mi pariat an tel ve thung a; eng emaw chen title kawl tawh Lalchhanhima'n mi thar Nazareth Lalṭhazuala lakah inlehthalna a pumpelh hram a, 4-3-in a chak.

Saitual chhuanvawr Chhanhima hian thawh khatnaah thiamna a neih chhawrin point li a hmu nghal a. Combat sports hrang hrang khel kual nasa tak Zemabawk tlangvalin nawr letin thahrui a nei a, thawh thumna thlengin a fei a, mahse, tawnhriat a tlachham a, point thum bak a hmu ve hman ta lo.

Republic Veng inchai chak Lalhmangaihzuala'n 6-4-in amah aia tawnhriat nei ṭha Lalhruaitluanga (Kolasib) a hneh ve thung a, a tir lamah hniam zawk mah se thahrui nei leh chau har zawk a nihna chhawrin a ṭuan a ṭha zawk bawk a. Semifinal-ah Chhanhima nen an inhmachhawn dawn a ni.

Champion tawh Bulfekzawl inchai chak Lalawmpuia'n title lak kir a tumna a puitling zo lo nghal teuh hle a, Jacob Lalrinliana (Venghlui) nen thawh thum an inchai zawh thlengin 4-4-in an inhnehtawk. Inbanphawi hmangin chak zawk an zawng a, Awmpuia a tlang hram.

Saitual tlangval Johny Lallawmkima'n harsatna lian tawk loin John Lalremmawia (Kolasib) a hneh ve thung a, 6-0-in a chak. Semifinal-ah Lawmkima'n ani aia hnuhma nei ṭha Awmpuia a hmachhawn a ṭul dawn a ni.

Nimin leh nizan khan inelna hi neih chhunzawm a ni a, ruahman dan chuan vawiinah a hmawr bawk a ni ang. Inchai hi LPS 10 leh LPS youtube channel-ah live-a pek chhuah a ni.