Wimbledon Williams unau karah Kerber leh Vesnina

Grass Court-a khelh a nih vang te, incheina ang khat an hak avang te leh khawvela tennis tournament upa ber a nih vanga mite hriat hlawh Wimbledon 2016 hmawr bawk a hnai ta. Thawhlehni zan khan Centre Court-ah hmeichhe single quarterfinal khelh zawh a ni a, Serena Williams leh Venus Williams te bakah Angelique Kerber leh Elena Vesnina ten an khingpui ṭheuh an hneh.

Kum 2000 leh 2010 inkar khan Serena leh Venus te hian Wimbledon-ah ro an rel hneh hle a, an pahniha an champion zat belh khawm chu vawi kua niin midang tan kum khat chiah an zuah ve! Hemi hnuah Serena chu hmalam panin a kal zel laiin Venus erawh a hnung tawlh thung - kuminah hian final-ah Williams unau inkhel kan hmu leh maithei.

World number 1

Grand Slam vawi 21 cham-pion tawh Serena hi kuminah hian player tawhkhirh ber tura ngaih a ni sa a, rinlawk ang ngeiin semifinal lut tur hian set khat chiah a hloh a - Russian Anastasia Pavlyuchenkova lakah ace vawi 11 siamin darkar khat leh minute 13 chhungin 6-4, 6-4 in hnehna a chang.

Wimbledon vawi ruak cham--pion tawh leh nomawi kawl mektu ni bawk Serena chuan, "Hnehna chan tumin ka khel a, ka beisei ang a thleng dik bawk. Venus-i'n hnehna a chan ve bawk avangin ka lawm a, a lunglen thlak zawng a ngaihtuah theih pawh a ni hial," a ti.

Kum 34-a upa Serena chuan Austrlian Open leh French Open final-a a chak loh a la theih nghilh lo a, "Kumina ka zirchhuah chu inkhela hnehna chan tuma rilru sawrbing hi a ni," tiin court pawn lam thil ngaihtuah chuan result ṭha a neih theih loh zia a hre chiang.

Venus a lo kir e

A ball vuak na tak leh tha-hruai ngah vanga player dangten an hmachhawn châk loh Venus Williams hian kum 1997 khan Wimbledon-a a match hmasa ber khelin 2000, 2001, 2005, 2007 leh 2008-ah te khan a lo champion tawh.

Tunah chuan kum 36 zeta upa a lo ni ve ta. Mahse, Armerican star hi a kum aṭanga teh chi a ni lo - seeded pariatna Venus hian Yaroslava Shvedova lakah 7-6, 6-3 a hnehna changin semifinal a inhlangkai a. Wimbledon 1994-ah khan kha tih laia kum 36 mi Martina Navratilova-i chu pahnihna a lo ni tawh a, ani tih lohah chuan Venus hi semifinal lut leh thei upa ber a ni.

Kum 2011 khan Venus hi a taksa hrisel lohna vangin a inkhel mumal thei lo tawh a, WTA ranking-ah pawh 100-na hnuai lam a ni hman. Mahse, a dam hnuah lo kir lehin player haluhawm a ni leh tawh a, inelna ṭan dawn khan mipuiin amahah rinna nghat ngam lo mah se tunah chuan champion tura rinkai a ni leh der tawh.

Kerber a buai lo

Australian Open champion Kerber chuan seeded pangana Simona Halep lakah inkhel hautak a hmachhawn a, hun pawimawhah a huaisenna a lantir theih avangin 7-5, 7-6 in hnehna a chang.

Quarterfinal inkhel hmasa berah player pahnih ten an service an hum tawk lo a, Halep hian break point vawi riat a hmuh aṭanga ṭum ruk ngawt a hmang ṭangkai thei, ṭum dang ang chu nise hnehna chan pui tham a ni. Mahse, Romanian nula hian German nula lakah a service a hum zo bik lo a, Kerber hian break point vawi 11 a hmuh aṭanga ṭum sarih a chhawr ṭangkai theih zawk avangin a tawpah a dingchang.

Seeded palina Kerber chuan, "Kan khel ṭha dun hlein ka hria, break point kan hmu hnem dun hle a, huaisen takin kan bei let ve ve bawk. Inkhel boruak sang tak a nih avangin duh anga khelh a harsa a, a bik takin service kha lak a harsa a ni," a ti.

Beisei loh Vesnina

Tournament ṭan dawn khan WTA raking-a 50-na Elena Vesnina hi semifinal-ah world number 1 Serena nen an inhmachhawn ring an awm lo mai thei. Mahse, Russian nula hian beisei baka ṭhain a khel a - Court One-ah seeded 19-na Dominika Cibulkova chu darkar khat leh minute 16 chhungin 6-2, 6-2 in a hneh.

Wimbledon 2016 match li a khelh aṭanga set khat chiah la hlohtu Vesnina chuan, "Ka nghak a, ka nghak zel a, tunah chuan a lo thleng ta. Grand Slam-ah ṭha takin ka khel thei ang tiin rilru ka siam a, semifinal ka thleng hian mipui a barakhaih ang thoin kei pawhin mak ka ti," a ti.

Quarterfinal inkhelah bik kum 29-a upa Vesnina hi a che ṭha takzet a, a khingpui lakah a service a hum vek bakah Cibulkova service ṭum thum chhuhsak theiin inkhelh chhung zawngin dinhmun hlauhthawnawmah a ding lo - semifinal-ah Serena a hneh a nih pawhin a mak lo ang.