Auba goal a pawimawh - Mikel Arteta

Mikel Arteta chuan Pierre-Emerick Aubameyang-a‘n goal a khung ve leh ta chuan boruak ṭha a siam a beisei, tun dinhmuna Arsenal mamawh chu goal khung theih a nih thu a sawi.

Gunners captain Auba hian season hmasa lama a goal khung thiam kha a theihnghilh a, an match hnuhnung bera Southampton an hmachhawn ṭumin a khung leh tawh a, a team chakpui zo lo mah se point khat an hlawh chhuak.

Arteta chuan, „A goal khung khan inrintawkna a pe ngei ang, tun dinhmunah chuan goal khung kha a mamawh,“ a ti a, player leh club in goal an mamawh thu a sawi tel bawk a ni.

North London club hian zanin dar 11:00 hian Premier League khel turin Everton an lenchilh dawn. Carlo Ancelotti naute hian season bul an ṭan fuh, pangana an ni mek - Gunners erawh 15-naah an awm thung.

Gunners lamin goal khung an harsat lai hian Toffees striker Dominic Calvert-Lewin erawhin league match 11 aṭangin goal 11 a khung der tawh, England international goal khung leh Arsenal team pumpui goal khung zat a inang mek!

Zanin hian Arsenal lamin Granit Xhaka leh Gabriel Magalhaes te chu hrem vangin an chhawr thei dawn lo. Everton midfielder James Rodriguez pawh a hliam a la dam chiang lo a, captain Seamus Coleman erawh inlan thei tawh tura beisei a ni.