Atletico-ah Lenglet a lut

Barcelona defender Clement Lenglet chuan season khat chhung loan-a khel turin Atletico Madrid a pan a, La Liga an elpui club a pan hma hian Nou Camp-ah kum 2027 thleng cham turin contract thar a ziak phawt.

Kum 29 mi defender hi Barca-ah a khel phak lo a, season hnih liam ta kha Tottenham Hotspur leh Aston Villa-ah loan-in a khel bawk a, tunah Atletico Madrid a zawm leh ta.

French club Nancy aṭanga bul ṭantu Lenglet hian season hmasa khan Villa tan inelna hrang hrangah match 25 a khel a, assist vawi khat a nei.

Diego Simeone enkawl Atletico hi tun nipui transfer-ah an ṭang hle. Clement hma hian defender Robin Le Normand (Real Sociedad), forward Alexander Sørloth (Villarreal), striker Julián Alvarez (Manchester City) leh midfielder Conor Gallagher (Chelsea) an la lut tawh.

Mahse, La Liga match hmasa berah Villarreal hneh zo loin, 2-2 in an inhnehtawk a, an match hnihnaah 3-0 in Girona an hneh thung. Atletico hi zanin dar 1:00-ah league match khel turin an inlan lehnghal dawn a, Espanyol an mikhual ang.