Ramsanga'n international tournament-ah bronze a la

Kotak India Junior International Series 2024-ah Mizo hming a mawi leh ta a, C. Lalramsanga chuan Under 19 mixed doubles category-ah bronze medal a dawng. Durtlang rawlthar Ramsanga hi Mizo zingah International level badminton tournament (junior)-a medal la thei hmasa ber a ni a, Mizoram badminton tan sulhnu ropui bik a hnutchhiah.

Hyderabad khawpuia August 20-25 inkara neih inelnaah hian Ramsanga hi Pragati Parida nen inkawpin, round of 32-ah NS Chauhan & Liza Taank (IND) te chu 21-13, 21-8 in an hneh a, round of 16-ah Aditya Tripathi & Krisha Soni (IND) te chu 21-17, 21-15 in an hneh leh bawk.

Quarterfinal-ah Mizo tleirawl Lalrempuii leh Arsh Mohammad inkawp tum lehin, Ramsanga te hi 10-21, 21-18, 22-20 in a chak zawkah an ṭang a, international level quarterfinal-a Mizo an intawng ringawt pawh hi lawmna tham a tling tawh.

Ramsanga te hian semifinal-ah seeded no. 1, Attawut Sreepeaw leh Pannawee Polyiam-te ṭangdun an hmachhawn a, Thailand shuttler pahnih lakah hian first game chu 22-20 in la mah se, second game hi an tumpuiten 21-14 in an la ve leh a, deciding game khelh a ngai. Ramsanga ten 18-15 a hmahruai lai nei hman mah se, an inpawhthlaktir leh a, 22-20 in a chak lo zawkah an ṭang - a uiawm takzet.

Quarterfinal-a tla ta Rempuii hi Serchhip lam mi niin, a ṭanpui Arsh nen round of 32-ah Chinese Taipei lam mi, Yan Bin Huang & Lin Yun An-te ṭangdun chu 21-17, 21-17 in an hneh a, round of 16-ah Ashish Grag & Krishika Mahajan (IND) te chu 21-12, 18-21, 21-16 a hneh lehin quarterfinal-ah erawh Ramsanga te an ngam ta lo - Mizoram Badminton Association (MBA) chuan bronze medal latu Ramsanga leh quarterfinal thleng thei Rempuii te an lawmpui thu thuchhuah an siam.

August 27, Thawhlehni hian Yonex-Sunrise India Junior International Grand Prix 2024 khelh zui a ni dawn a, Mizo shuttler pali an inlan ang - September 1, Pathianni thleng awh tur niin, U19 Men's singles-ah main draw lut sa H. Lalṭhazuala a inlan dawn a, U19 Women's singles-ah qualifying aṭangin Lalrinkimi a inlan dawn bawk.

Bronze medal la hlim Ramsanga chu U19 men's doubles-ah a partner nen seeded no. 6 niin an inlan dawn a, U19 mixed doubles-ah seeded no. 4 an ni bawk. Rempuii pawh U19 women's doubles-ah seeded no. 4 niin a partner nen an inlan dawn a, U19 Mixed Doubles-ah main draw an lut sa bawk - Mizoram badminton-in kawng dik a zawh zel.