Champion thei kan la tam - Martin

Pathianni tlai dar 5:30 hian MotoGP Austrian Grand Prix chu Red Bull Ring-ah an tlan dawn, rider championship hmahruai mektu Jorge Martin chuan champion thei an la tam tih a sawi.

Ducati rider hian point 241 a hmu tawh a, amah hnaih bertu Francesco Bagnaia nen an inthlauhna chu point thum chauh a ni a, hmabak an la ngah avangin an dinhmun hi a la inthlak thei tih a chiang.

Spanish tlangval Martin chuan, "Red Bull Ring hi tun hma aṭangin kan team tana hmun nuam a ni ṭhin, chutihrualin keimah ang bawka Ducati bike khalh leh midang tan pawh hmun ṭha a ni ve tho.

"Ka hmuh dan chuan kei leh Bagnaia chauh hi inel kan ni lo, a sang pali te hi chu season tir aṭang khan na takin kan la inel ngar ngar, chuvangin Enea Bastianini leh Marc Marquez te hi sawi bo theih an ni lo ang.

"Intlansiak pakhat hian thil tam tak a ti danglam thei a, intlansiak pangngai bakah sprint race a awm tel ṭhin avangin danglamna hi a thleng nasa thei zual hle, chuvangin inthlahdah a thiang lo," tiin a sawi.