I Day Football-ah AFC dang thei an awm em? Awm e, BS-a enkawl Mizoram Police

GIG Motors I Day Football 2024-ah final hma zawngin Aizawl FC an chak vek a, I League club hi champion tura rinkai ni mah se Mizoram Police-in thawnthu danglam an ziak ta zawk - Lalbiaksanga Colney hoten nomawi an chawi.

August 15, Inrinni zan inkhelah ruahsur vangin inkhel entu tam tawk lo mah se football tuichilh chin chu RG Stadium-ah an pungkhawm. Ruahsur kara mipui pungkhawm an vannei a, Mizo football star thar an hmu. Tlangmawi rawlthar Michael Lalbiaksanga'n goal hnih khungin Police a champion pui a, best player-a thlan a ni bawk.

Final-ah hian Police tan Michael-a bakah player thar FC Lalhmunmawia leh Isaac Malsawmkima ten goal an khung a, Aizawl FC tana Peter Lalrinhlua leh Zomuansanga te goal khung a tawk zo lo. I League club-in Covid-19 hnuah nomawi an la chawi lo a, kum zawnin I Day Football final-ah an chak lo.

A mawi chuang e

Aizawl FC-in inrintawkna nen bul an ṭan a, inelna hmang ṭha an ni bawk a, inkhel pawh an thunun nghal. Mahse, ruahsur vangin ṭum danga an khelh angin passing game khelh a harsa a, Police tan erawh malsawm ruah a ni thung.

Final hma zawnga goal khung thiam, match nga leka goal 21 khung thei team khan Police goalkeeper R. Malsawmkima (Mana) tan buaina an siam pha lo. Police erawhin pressure an ngam a, H. Lalbiakthanga, Lalfakzuala leh Malsawmfela ten an theihna tak an pholang.

Tawnhriat nei ṭha player karah Michael-a a kawlhrawng a, Aizawl FC goal lamah tlangnel takin ball a khalh ngam. Tlangmawi rawlthar hian AFC midfielder Samuel Lalmuanpuia bumin box chhungah a la lut a, NFC U20-a Mizoram tana a khelhpui C. Zomuanpuia (Muantea) bum lehin minute 22-naah goal mawi bik a khung.

Michael-a'n inrintawkna a nei chho a, goal hnihna a khung zui. Minute 29-naah MPL10-a Police champion-na tura player pawimawh F. Lallawmkima ke aṭanga ball ṭha bik chu Michael-a'n dang per deuh mah se AFC keeper Lalhriatpuia kap karah a khung ta tho.

Goal hmaah Police an hriam a, minute 43-naah Lalbiakhlua (Biaktea) corner kick chu FC Lalhmunmawia'n a tauh lut. I Day Football hma chiaha Police zawmtu FC-a hi Police-in tlarhnung an ṭhatpui a, Mizoram tana a dinpui Lalhmunmawia (Ahmuntea) nen an inkawp rem nghal hle.

AFC an infuih thar

Season liam ta khan I Day Football final-ah Aizawl FC an chesual tawh a, halftime-ah an infuih ṭha. Second half-ah Zembawk North tlangval Peter Lalrinhlua rawn luh nghalin goal thum chhuah tawh mah se beisei neiin khelmualah an rawn lut.

Aizawl FC-in Police tlarhnung an rum ṭhaih a, final hma zawnga match zawng zawnga goal khung vek thei Lalbiakdika'n a theihna a rawn lantir ṭan. Amaherawhchu BD-a hi goal hmaah a vannei tawk lo a, goalkeeper chauh a hmachhawn hnuah a khung lo a, Man-a'n a dang ṭha ve bawk.

Striker C. Lalhriatpuia pawhin Police tlarhnung tan buaina a rawn siam a, minute 62-naah an nawr nat rah sengin goal an hlawh chhuak ta bawk. Vei lam aṭanga Lalrempuia ball vawrh luh ṭha zet chu keeper Man-a'n a chhut fuh tawk lo a, Peter-a'n a tauh lut.

Aizawl FC-in substitution an siam fuh a, Peter-a'n goal a khung hnuah bench aṭanga lut bawk Zomuana'n a khung. Minute 77-naah BD-a cross chu Zomuana'n a tauh lut a, Aizawl FC-in beiseina thar an nei a, Police dinhmun a him ta lo.

A tawp kharna chu

Chhum zin vangin hun rei lote an chawl a, team pahnihin infuihna hun ṭha an nei ve ve. Aizawl FC-in si phurh sut ngei tumin an rawn nawr chhunzawm a, mah se Police-in na takin an vaw let ve reng.

Goal hnih khungtu Michael-a'n minute 90 a daih a, second half-ah pawh mual vei lamah ṭha taka ball la lutin a cross ball duhthusam chu Biaktea'n goal-ah a chantir lo.

Mahse, Michael hi a beidawng lo a, 3-2 a nih lai pawhin a theihna a lantir thei tlat. Minute 85-naah mual laiah Michael-a hian inrintawkna nen ball a la a, a tawk chiaha thui ball a ken hnuah Isaac-a tan ball duhthusam a pe. Police winger Isaac-a'n a ball ṭha hmuh hi goal kilah tak a khung a, Michael-a ball pek 'class' ang thoa 'class'-in goal-ah a pet lut a, dinhmun ṭhaah Police a dah.

Aizawl FC tan erawh beisei a bo a, BD-a'n beidawn vanga Isaac-a a pet tluk avangin red card a hmu. Champhai Zotlang tlangval hian best player a chân phah a tih theih a, chutihrualin Police nomawi chawipuitu Michael-a'n a phu tawh hrim hrim a tih theih bawk.

Tlangmawi rawlthar

Police player-te an upa deuh tawh tih thawm a ri nasa a, a dikna chen pawh a awm. Tun season-ah erawh civil player an la lut ṭha a; final-a che ṭha Michael, Lawma, FC-a leh Isaac te hi civil player vek an ni.

Michael hi R. Laldanmawia leh Lalrinchhana Tochhawng te ang thoa 1st Bn MAP Football Academy chhuak a ni a, hmabak a nei êng hle. Season liam ta khan MPL-ah Police tan goal a khung tawh a, tun season ṭa hmain U20 National Football C'ship-ah Mizoram tan a tel a, I Day Football-ah pawh final-ah chauh a che ṭha lo.

Michael-a hian NorthEast United lakah goal awmchhun a khung a, Chawnpui lakah chakna goal khung lehin match of the match-a thlan a ni a, final-ah goal hnih leh assist ṭha bik neiin man of the match a ni leh bawk. In 50 pawh awm tlin lohna Tlangmawi tan chauh ni loin Mizoram tan beiseina thar siamtu a ni thei ang.

Lawm leh ngui

Inkhelh zawha ruah tlain Police hlim hmel a hliah pha lo a, Police hotute, player leh coaching staff te an champion avangin an lawm tih hmuh hmaih rual a ni lo.

Coach Lalbiaksanga Colney chuan, "Aizawl FC ṭhatna kan hrechiang a, chumi tur chuan kan thawkrim bawk. Ni hnih chhung hun ka nei a, an video en letin nasa takin an khelh dan ka zir. Final-ah kan tum kan ti thei a, ruahsurin min pui bawk," tiin Vanglaini a hrilh.

Police coach chuan sawi chhunzawmin, "Engkimah kan pute leh kan Police puiten min thlawp ṭha em em a, an chungah lawmthu ka sawi. Tin, kan naute (Players) tum ruhna leh huaisena hi ka fak lo thei lo a ni," tiin a sawi.

Aizawl FC lam erawh ruahsuriin an mittui hliah bawk mah se an ngui tih thup theih a ni lo. Final hnuhnung pahniha vanduai AFC coach Victor Lalbiakmawia chuan, "Han sawi tur vak pawh ka hre lo. Kan vanduai a ni. Ruahsur vangin kan duh angin kan khel thei lo a, first half-ah kan chesual. Second half-ah insiamṭha leh mah ila, kan tho chhuak zo ta lo. Kan ui tak zet," tiin Vanglaini a hrilh.