Mizoram Subroto team feh chhuak

Mizoram Under 15 team chu 63rd Subroto Cup International football tournament khel turin an feh chhuak - Mizoram aiawh hian Govt. Chawngfianga Middle Schhol zirlaite an kal a, anni ho hi Saidan, Kolasiba football zirlaite an ni.

Mizoram team hian Mizoram an chhuahsan tawh a, vawiin hian Guwahati aṭangin Bangaluru an pan ang. Mizoram team hi Sports & Youth Services Department coach tawnhriat ngah Lalthawmmawia leh manager Rozamliana ten an hruai a ni.

Subroto Cup hi khawvel huapa school naupangte inelna ngaihhlut hlawh tak niin, kum 1960 aṭang tawh khan kum tin neih ṭhin a ni. August 19, Thawhṭanni aṭanga khelh ṭan tur a ni ang.

Subroto Cup-ah hian khawvel ram hrang hranga junior football team te pawh an rawn tel ve ṭhin a. Brazil, Australia, United Kingdom, Ukraine, Switzerland, Sweden, Sri Lanka, Bangladesh, Nepal, Afghanistan, Malaysia, Israel, Bhutan, UAE, Indonesia leh Uzbekistan te pawh an lo tel tawh ṭhin a ni.