Chelsea khelmualah champion Manchester City

Kan nghahhlelh, Mizo mipa tam tak 'mood' thlak danglam theitu Premier League a lo kir leh ta - Pathianni zan dar 9:00 hian inkhel hmuhnawm bik chhawpsak kan ni dawn a, Chelsea khelmualah champion Manchester City an lenglut dawn.

Manchester City-in nipui transfer-ah Savinho chiah la la lut rih mah se, coach atan Pep Guardiola an la neih miau avangin an chi ai lo a, tun season-ah pawh ṭum dang ang thoin champion tura rin hlawh ber an ni lehnghal!

Player lakluh tam hi champion tur teh nana hman ni se, Chelsea aia champion phu an awm lo! Blues hian tun nipui transfer-ah player pakua ngawt an la lut leh tawh a, player thar an neih zat ringawt hi chaw eia sawm hautak tham an tling.

Mahse, Blues hian beiseina sang tak pakhat an nei a, chu chu coach thar an neih vang a ni. Championship-a Leicester City champion puitu Enzo Maresca an la lut a, Italian coach hnuaiah beiseina an nei sang hle.

Pep-a nau

Premier League-ah coach ropui tak tak an lo awm tawh ṭhin a, Pep Guardiola anga English top flight league thunun thei erawh an la awm lo - City-ah season riat a cham chhungin league nomawi paruk a chawi tawh.

Hei vang hi a ni mahna - Pep-a nau lo nih tawh ringawt pawh football coaching khawvela hlutna tham a tling. Arsenal-in Mikel Arteta an lakluh chhan langsar zingah Pep-a nena thawkdun tawh an nihna chu a tel a, Bayern Munich-in Vincent Kompany an iai loh chhan pawh Pep hi a ni, an ti tlat!

Chelsea-in coach atana Foxes enkawltu Enzo Maresca an rin chhan pawh Pep-a assistant a lo nih tawhna chu a ni a, Pathianni zanah coach inhrechiang pahnih an intawng dawn a, chak an tum ngam ve ve dawn.

Team pahnih danglamna erawh City hi chu team nghet sa an ni a, Chelsea erawh Todd Boehly leh a thawhpuiten club an lei hnuah lei rem rah tumin an la inher vel mek. Enzo hoin pre-season-ah vawi khat chiah an chak!

Buai leh buai lo!

Maresca-a'n player a kawl zozaite engtin nge a her rem dawn, tih chu thil hriat châkawm a ni a, teh thiam a harsa. Boehly leh a thawhpuiten kum 2022-a Chelsea an lei aṭang khan player lei nan euro tluklehdingawn 1.3 an hmang tawh a, tam tak a ni.

Mahse, Mauricio Pochettino hnuaiah an khelh dan a nghet dawn chauh a, an ban leh lawi a! Tunah Maresca hoin an ṭhat dan tur an zawng leh mek - Cole Palmer bawk chu mit fukna tur a ni leh dawn a, a chet ṭhat leh ṭhat loh hi Blues dinhmun hriltu tur a ni ang.

Euro-a khel ṭha em em mai Marc Cucurella-a'n an champion lawmnaah ama hla an phuah a sa a, "Haaland pawh hlauin a khur," tih a tel - zaninah Erling Haaland a hmachhawn nghal dawn a, Spanish left back hi a khel a nih ngat chuan Haaland-a'n goal khung a châk lehzual sawt dawn.

Blues-in player thar pakua ngawt an neih laiin City-in Savinho chiah an la lut a, bul a ṭan nghal erawh a beiseiawm. Bernardo Silva leh Kevin de Bruyne te nen an inlan ho chuan Chelsea tan talbuaina tham a ni ang.

Thlir châkawm

Chelsea player thar tam tak zingah, Fulham aṭanga lak centre back Tosin Adarabioyo chu bul ṭan nghal tura beisei a ni a, chuti a nih chuan Blues neituten hralh thiang lo ang hiala an sawi Levi Colwill nen a laiah an inkawp thei ang.

London club hian captain Reece James chu hliam vangin an chhawr thei dawn lo a, a hmun ruak luah turin Malo Gusto a awm - tlarhnung hi City goal nawr na dawl zo tura rin ngam an harsa!

Tlarhmaa Blues inlan dan tur pawh hriat châkawm zingah a tel a, Armando Broja leh Romelu Lukaku te chu club chhuahsan thei dinhmuna an din reng avangin Nicolas Jackson, Marc Guiu leh Christopher Nkunku te chu duhthlan tur awm an ni.

Raheem Sterling-a'n a club hlui City hmachhawn a châk ang tih a chiang a, Mykhaylo Mudryk aiah a luh a rinawm. Zanin hi Chelsea tan inenfiahna hun a ni a, City-in hnehna an chan nghal chuan champion tura rin an hlawh lehzual ang.