Zanin dar 8:00-ah CYMA Hmeichhe Volleyball final : Bungkawn Vs Vaivakawn

CYMA leh MVA buatsaih LBS Suzuki 23rd Inter Branch YMA Volleyball Tournament 2024 hmeichhe final chu zanin dar 8:00 hian R. Dengṭhuama Hall-ah khelh a ni dawn a, vawi sarih champion tawh leh vawi hnih final thlenna Vaivakawn te an inkhel dawn. En man hi Rs 50 chauh a ni.

Bungkawn hi an champion a nih chuan record thar an siam dawn a, semifinal-a an hneh Kanan aiin vawi khatin an champion tam dawn. Vaivakawn erawhin mellung thar phun an tum dawn a, a vawi khat nan champion ngei an tum ang.

Beisei nei Vaivakawn

Vaivakawn hian nikum finalist Kolasib Diakkawn chu quarterfinal-ah an lehthal a, set hnih an hloh hnuah 3-2 in an chak. Semifinal-ah nikum semifinalist Armed Veng South 3-1 in an hneh leh a, team ṭha ber ni lo mah se team inlungrual tak an ni tih a hriat theih.

Vaivakawn coach Eric Lalsangliana Pautu chuan, "Champion ngei tumin kan khel dawn. Practice-naah kan intum tawh ṭhin a, kan hneh ngai lo. Final-ah erawh result dang neih kan besei," tiin Vanglaini a hrilh.

AVS an hneh theih nan Lalramengi Ralte leh Sarah Lalsuiengi Tlaisun te an ṭangkai a, final-ah team ṭha zawk an hmachhawn dawn avangin Elina B. Lalenkawli leh Zomuansangi te an pawimawh ang.

Eric chuan sawi chhunzawmin, "Final-ah chuan Vaivakawn mipui pawhin min ṭawiawm ṭhat ngei kan beisei. Mipui puihna kan mamawh a ni," tiin a sawi.

A vawi 8 nan

Champion lai Bungkawnin a zawna a vawi thum nan champion theihna hun ṭha an nei a, CYMA Volleyball record thar siama vawi riat champion thei dinhmunah an ding.

Coach Lalruatsanga Sailo chuan, "Straight set chuan kan hneh ang ka ti ngam lo a, kan chak ngei erawh ka ring. Chutihrualin final boruak erawh a dang ṭhin a, eng result pawh thleng a ni," tiin Vanglaini a hrilh a, RG Stadium-a Bungkawn mipui tam tur thu a sawi bawk.

Melody Lallawmkimi captain-na hnuaia khel Bungkawn hian FP Lalduhkimi, RK Lalfakmawii neh F. Lalparmawii te an nei a, Pro Volleyball club nei veng a nih bawk avangin champion ngei tura ngaih an ni.