Arsenal leh 'Next Season'

En teh, a lo her chhuak leh dawn ta, tih ang khan Premier League pawh a lo her chhuak leh dawn ta. Arsenal hian champion turin squad a nei chhah ṭha tawk em, tih chu a chhanna kan hmu dawn, bazar nan hun tlem erawh an la nei.

Coach Mikel Arteta-a'n danglamna a thlen a, mahse chu a danglamna chuan Premier League nomawi a la keng tel rih lo. Amah chher hriamtu Pep Guardiola leh Manchester City lakah a ruh no zawk an ni leh mai ṭhin.

Tun hnai season hnih chhung chu Gunners hian beisei an nei sang thei hle a, mahse a hmawr an la bawk famkim miau loh avangin 'Next Season' an ti leh mai ṭhin. Ṭhangkhat lian zet chu season thar an nghak tawh, an nghahna lamah an ring a kham tawh hle ang.

EPL bikah chuan Arsenal an champion hnuhnung bera (2003-04) nau piang te kha College zirlai an ni tawh a, nomawi chawi chaka an tuihal tawh tur zia chu hei hian a ti fiah - season thar hi an champion hun a nih si loh chuan, engtikah nge ni chuang ang tih chu ngaihtuah tham a ni.

Hmel thar Calafiori

Arsenal hian season hmasa khan EPL club zingah goal an chhuah tlem ber a, goal chhuah lohna inkhel an nei tam ber bawk. Hetiang chung hian Arteta-a'n tlarhnung a la thuam chak zual, a hnung lai leh left-back atana hman theih Riccardo Calafiori a lalut.

Tun dinhmunah chuan William Saliba leh Gabriel te inkawp aia ṭha hi duhthlan tur dang an tam chuang lo a, a sir lehlamah Ben White chu khawih thiang lo ang maia nghet a ni bawk - season hmasa an buaina chu Jurrien Timber inhliam kha a ni.

Dutch defender Timber hi tunah chuan a dam tawh, mahse atan hmun nghet chan a awlsam dawn lo. Season thar inbuatsaihna an neih lai chuan Oleksandr Zinchenko hman rim a ni, an match hnuhnung berah Calafiori a inlan bawk.

Italian defender Calafiori hian tharum a ngah - a elpui tur Timber leh Zinchenko te aiin a palian bawk. Tharum hman tamna EPL-ah chuan a rinlak a rinawm a, an khingpui tur a zirin season tir lamah chuan an inkhelh chhawk hlawmin a rinawm.

Manchester United manager ropui Sir Alex Ferguson khan, striker goal khung thei chuan inkhelah hnehna a chanpui che ang a, defender ṭha erawh chuan a champion pui ang che, a lo ti tawh ṭhin. Arteta pawh hian a venhim lam a ngai pawimawh hmasa a ni.

Rice leh Saka

Arsenal player man tam ber Declan Rice hi West Ham leh England tana a khelh ṭhin dan aia hma hretah Gunners tan chuan a khel ṭhin, coach Arteta-a'n box chhung leh a chhehvela che tam turin a duh, season tharah pawh kalphung thar aiin an kalphung hmasa an hman nawn a rinawm.

English midfielder Rice thlawptu tur hi an mamawh lai chu niin a lang - captain Martin Odegaard chauh ni loin, ball sem leh defender pui thei an ngai, an neih sa an tawk zo lo deuh tih chu season hmasa khan kan hmu tawh - Real Sociedad duhlai Mikel Merino an la thei a nih chuan ṭhatpui tham a ni ang.

Gunners chakna kungpui pakhat chu Bukayo Saka a ni a, an chak lohna lai tiin a sawi theih bawk. England international hian hliam a nei khat a, a inkhel tam ṭhin bawk - mahse mihring ve tho a ni a, a che ṭha reng thei bik lo - thachhang dawltu a nei ṭha tawk lo hi an tuar zauh zauh.

Emile Smith Rowe a chhuak tawh a, tuna a lan dan chuan Saka elpui hautak tur an nei lem lo. Hale End chhuak a nih miau avangin Saka hian ngainat a hlawh a, a hriam tawk bawk, chutihrualin amah ti ṭang zual tur elpui a mamawh.

Academy aṭangin midfielder pahnih Myles Lewis-Skelly leh Ethan Nwaneri te senior team zingah an tel dawn, anni pahnih hi pre season hman lai pawhin an khel a hmuhnawm ṭhin, season thara Arsenal hmel thar tur zinga mi an ni thei ang.

Havertz an ring

Nikum Krismas vuakvetah Arsenal an che buai a, an buai chhan chu goal an khung theih loh vang a ni - an champion loh chhan langsar ang pawhin a sawi theih. Fans lamin nghakhlel takin thlasik bazar an ngak a, mahse striker an lei lo.

Kai Havertz chu tlarhma laiah chhawr niin a khel chhe lo, season tir lama sawisel hlawh kha a tawpah chuan an fak rawn a ni tawh. German forward hian tun season chu mawhphurhna a nei sang zual dawn - Gunners player zinga hlawh tam a nihna a lantir a ngai dawn tihna a ni.

Gabriel Jesus an nei bawk - Brazilian striker Jesus hi player thiam tak ni mah se goal a khung tam tawk lo ṭhin, tlarhma laia hmun nghet chang tur chuan thapui a thawh a ngai dawn. Season hmasa kha hliam vangin a buai, kuminah erawh a tir aṭangin a khel thei dawn - Havertz nen inelna ṭha an nei ang.

Eddie Nketiah an la nei bawk - Hale End chhuak hi a man an chhiar ang zata lei ngam awm se la chuan hralh an pawiti lo. Mahse, tun thleng chuan club dang nen an la inbe rem thei lo, ani hi a chhuak a nih chuan tlarhma lama khel thei midang an melh a rinawm.

Mikel Arteta-a'n a squad neihah a lungawi thu a sawi tawh a, player dang la tur pawh ni se bazarah lei mai tur an tam lem lo. Spanish manager hian Arsenal hi season pumin a enkawl vawi ngana a ni dawn, nomawi an la chawi chuang lo a nih chuan a laka dawhthei ṭhin ten an sawisel tawh ang - Arsenal leh Next Season chu August 17, Inrinni zan hian kan hmu ṭan dawn a ni.