US infiamna a buai: NBA, MLB & MLS an chawl!

Pathiannia US police-ten mihang pakhat Jacob Blake an kah duh lohna lantirin NBA team Milwaukee Bucks chuan Nilaini zana playoff game khelh tur an neih chu an ṭhulh a, hei hian infiamna khawvelah nghawng a nei lian nghal hle.

NBA chuan Bucks inkhel tur bakah hian Nilaini zan, India ram sanaa nimin zing lama NBA playoff match khelh tur awm pahnih chu a sawn nghal bawk a, Major League Baseball leh Major League Soccer ten thawm an nei ve nghal bawk. 

MLB hian game thum khelh tur awm chu a khelh hun an sawn nghal a, US-a football inelna sang ber MLS match nga khelh tur awm chu a khelh hun sawn a ni bawk a ni. Hetihlai hian tennis player lar Naomi Osaka chuan New York khawpuia Western & Southern Open khelh mek aṭanga a inhnuhdawh thu a sawi bawk a, semifinal lut mah se Blake-a thlawpna lantir nan a khel chhunzawm dawn lo. 

NBA chu 

Bucks player-ten Blake an thlawpna lantir nan Orlando Magic nena playoff khelh tur an neih chu an ṭhulh a, hemi hnu lawk hian Bucks player-te chuan thuchhuah an siam nghal. Bucks player-te hian, "Inthlak danglam duhin ngenna vawi tam a awm tawh a, mahse engmahin chhanlet a ni lo. Heng thil thleng zawng zawng ngaihtuah hian kan rilru chuan basketball lam a awn thei lo a ni," an ti. 

Milwaukee Bucks player-te chuan sawi zawmin, "Court chhunga inkhel tura kan luhin kan theihna sang ber hlan tura beisei kan ni a, chutiang chiah chuan thuneitute pawh hi dan an kenkawhna kawngah an theihtawp chhuah turin kan beisei a ni. "Jacob Blake-a tan dik takin rorel ni se kan duh a, he buaina thlentu officer-te pawh hrem ngei kan phut a ni," an ti a, Blake-a chunga thil thleng chu mi hang a nih avanga thlengah an ngai. 

US-a infiamna ngainat hlawh leh sum tamna Major League Baseball lam pawhin awm mai mai an tum bik lo a, NBA an thlawpna lantirin Seattle Mariners chuan San Diego Padres nena an inkhel tur chu an ṭhulh. 

Seattle Mariners thutlukna hi an team-a player-te an inrawnkhawm hnua siam a ni a, Milwaukee Brewers leh Cincinnati Reds pawhin inhmachhawn tura tih ni mah se an inhmachhawn loh tur thu an puang ve zui. MLB club pahnih chuan thuchhuah siamin, "Brewers leh Reds player-te chuan zanina inkhel lo turin thutlukna an siam a ni. Kan ram a dam lo a, natna khirh tak a tawk mek. Mipui ten he kan harsatna tak tak hi an thlir thiam theih nan thutlukna hi kan siam a ni," an ti. 

Hetihlai hian San Francisco Giants leh Los Angeles Dodgers-te pawhin an inkhelh hun tur an sawn thu an puang ve bawk a, thuchhuah inṭawm siamin, "Dodgers leh Giants-te chuan kan player-ten intluk tlanna leh thlei bik awm lohna duha lungawi lohna an lantir chu kan thlawp tlat a ni," an ti a, hun harsaah an player-te lam ṭan loh an duh lo. 

Football khawvela league ngaihven hlawh ni chho mek Major League Soccer chuan FC Dallas vs Colorado Rapids, San Jose vs Portland, LAFC vs Real Salt Lake, LA Galaxy vs Seattle Sounders leh Inter Miami vs Atlanta United-te inkhel tur chu an sawn thu an puang ve bawk. 

NBA playoff inkhelh hun an sawn a, Women's NBA lam pawhin awm mai mai an tum bik lo - Nilainia match khelh tur awm zawng zawng chu a khelh hun sawn a ni a, Atlanta Dream forward Elizabeth Williams chuan, "NBA lama kan unaute dinna kan ṭawmpui a ni," a ti. 

Milwaukee Bucks senior vice-president Alex Lasry chuan, "Basketball aia lian zawk thil dang a awm ve bawk. Vawiina player leh organisation-te thutlukna hian hlei lenna hi kan ning takzet tih a tilang a, a tawk zozai tawh a ni," a ti. 

Hetihlai hian basketball ngainatu leh US president hlui ni bawk Barack Obama chuan, "Bucks ten huaisen taka thutlukna an siam hi ka thlawp a ni,"  tiin twitter lamah a lo ziak ve bawk. 

NBA lamah hian Houston Rockets vs Oklahoma City Thunder leh Los Angeles Lakers vs Portland Trail Blazers chu khelh hun sawn a ni bawk a, NBA chuan playoff khelh hun tur hi ruahmanna thar an siam tur thu an sawi a, he thu buatsaih lai hian thuthar dang an la nei rih lo. 

LeBron James chuan, "Inthlak danglam a hun tawh - kan ning tawh takzet," tiin twitter lamah a ziak a, NBA player-te hi nimin khan an inhmukhawm a, he thu buatsaih lai hian eng thutlukna nge an siam hriat hman a la ni rih lo bawk. 

Western & Southern Open aṭanga inhnukdawk tennis player Naomi Osaka chuan, "Mi hang hmeichhia ka nihna angin ka tennis khel aia ngaihven ngai zawk thil tam tak a awmin ka hria," a ti a, a inhnuhdawh chhan a sawi. 

Hetihlai hian US Tennis Association, ATP leh WTA pawhin nimin lama inkhel awm turte chu an chawlh lailawk thu an puang a, vawiin lamah chhunzawm a nih tur thu an sawi bawk.