Beisei phak lo Blues

Transfer bazar-ah duhtawk chin lem nei lo mah se, Chelsea-in khelmualah an sum hman tam an lantir thei lo - season ṭan hmaa an match hnuhnung berah Inter Milan nen 1-1 in an inhnehtawk a, Chelsea hi pre-season-ah vawi khat chiah an chak tihna a ni!

Pathianni zan khan Stamford Bridge-ah Blues hian Inter an mikhual a, Italian champion hian Marcus Thuram hmangin goal an khung hmasa zawk. Blues tan minute 90-naah Lesley Ugochukwu chuan si phurh sutna goal a khung a, 1-1 in inkhel a tawp.

Chelsea tan Euro vanga chawlh hmang rei Cole Palmer leh defender Marc Cucurella te an lo kir leh tawh a, Inter Milan lakah an inlan. Coach thar Enzo Maresca hnuaiah Chelsea-in beisei ang game an la pholang thei lo a, season tharah an chhawm ang tih hlauhawm tak a ni.

Blues hian pre-season match hmasa berah League One club Wrexham chu 2-2 in an inhnehtawkpui a, Celtic-in 4-1 in an sawp zui. Club America lakah 3-0 in chak ve zuk mah se, Manchester City (4-2) leh Real Madrid (2-1) lakah tlawm zuiin, Inter nen an inhnehtawk.

Chelsea hian August 18, Pathianni zan dar 9:00-ah season thar atana an match hmasa ber chu an khel dawn a, champion lai Manchester City an mikhual ang.