Chanmari FC aia huai zawk Mizoram Police
GIG Motors I Day Football semifinal-ah Mizoram Police-in an zia an chhuah a, MPL10 final-a an hneh Chanmari FC chu 2-1 a hnehin final an lut. Lalbiaksanga Colney hoten boruak sang an ngam a, rinkai zawk leh tun season-a hneh loh la tawng lo Chanmari an hneh.
Nimin inkhelah hian Malsawmfela a langsar leh a, Police striker hian goal hnih khungin man of the match-a thlan a ni. Police hian kum 2022 khan coach BS-a hoin I Day Football nomawi hi an chawi tawh a, kum hnih hnuah champion leh ngei an tum. Final hi August 15, Ningani zan dar 6:30 hian RG Stadium-ah khelh tur a ni.
An inthlak kual
Chanmari FC coach Lalsangzuala Hmarin Isaac Vanmalsawma aiah KC Malsawmsanga a luhtir a, captain Lalrinchhana Tochhawng pawh inhliam vangin group stage-ah khel mumal lo mah se inkhel pawimawhah Lalhmangaihsanga nen an inkawp. Season liam ta khan Chanmariin semifinal-ah coach Lalsangzuala Hmar enkawl Chhinga Veng an hneh lo a, final an thleng zo lo.
Mizoram Police pawh an inthlak danglam hret a, goalkeeper-ah F. Lalmuanawma aiah Malsawmkima (Mana) a luhtir a, group stage-ah Malsawmfela bench-ah awm ngun deuh mah se semifinal-ah bul a ṭan. Lalbiaksanga Colney-in starting XI siksawi hret chungin, an ṭhat dan turin bul an ṭanah a ngaih theih.
Sawmfela class
Semifinal boruak sangah Police goalkeeper Mana a insiamrem mai lo a, pet chhuak tura hun a mamawh rei avangin Lalnunzama'n a tibuai hman. Minute khat pawh tling loah Sawmsanga'n goal khungna remchang a nei a, goalkeeper awm lohna goal-ah a pet lawk loh avangin Police defender Lalhmunmawia'n (Ahmuntea) a tibuai hman.
Chanmariin an hun ṭha an bawhpelh laiin Police erawhin an tisual ve lo. Minute hnihnaah left back Lalrodawngkima'n box chhunga awm Sawmfela a pe a, Police striker hian cool zetin goal kilah a push lut a, Chanmari defender Lalrinchhana Tochawngin a tibuai hman lo a, goalkeeper RS-a a che lo.
Inkhelh hmain Chanmari chu ṭha zawka ngaih ni mah se semifinal-ah Police an khel ṭha. Sawmfela'n hmun pawimawhah ball a chang thei a, a ke aṭangin ball ṭha a pe chhuak bawk. Rawlthar duhawm Michael Lalbiaksanga leh forward F. Lallawmkima te an nung ṭha a, Chanmari tlarhnung tan buaina tur a awm ve reng.
Chutihrualin Chanmari hi khel ṭha tawk lo mah se goal khungna chance erawh an nei ṭha. Group stage-a hattrick siamtu Vincent Lalduhawma'n crossbar a tihper a, MS Dawngliana'n hun ṭha ṭum hnih a bawhpelh a, goal hmaah Sawmsanga ke a hmui tawk lo. First half-ah Police-in goal khat an khung a, Chanmariin an khung ve lo.
Chanmari an comeback
Chanmariin second half-ah an attack dan thlak an tum a, bench aṭangin Moses Lalrinzuala an luhtir. Khatla East tlangval a nung ṭha a, minute khat pawh tling loah ṭha taka la lutin Zama tan a siamsak a, Chanmari striker-in a pet fuh lo.
Sanga hote an khel ṭha chhunzawm a, Lalruatpuia lakah Vincent-a'n penalty hlawkchhuakin minute 48-naah Zama'n penalty aṭangin si phurh a sut. Chanmariin si phurh an sut hnuah pawh inkhel an thunun a, Dawngtea'n hnai tak aṭangin a khung lo a, keeper Mana a ti ṭha ve bawk.
Sawmfela bawk
Chanmari attack na zualpui a reh a, Police lamin set piece an hmang ṭangkai. Captain Fakzuala freekick pet chu box chhunga awm Sawmfela'n a tauh thei zel a, minute 69-naah Ramhlun South striker-in a duhna takah a tauh a, goalkeeper RS-a tan dan ngaihna a awm lo.
Minute 69-naah Police-in 2-1 in hma an hruai a, Chanmari tan si phurh sutna hun a awm. Bench aṭangin I Day Football best player ni lai Lalnunzira bakah Isaac Vanmalsawma te luhtir mah se Lalhmunmawia (Ahmuntea) leh FC Lalhmunmawia (FC-a) te awmna Police tlarhnung an ṭhiat thei lo.
Police zawkin Chanmari laka khung belhna remchang an nei a, Sawmfela thawh ṭhat zarah Lawma'n box pawnah ball changin Biaktea tan a pe leh a, Police winger hian goal ban a pet per. BS-a hote an ṭangtluan a, 2-1 in hnehna an chang.
Inkhelh banah Police coach BS-a chuan, "Kan chak ring lotu tam mah se kei chuan kan chak ngei ka ring. Ka naute an khel ṭha em em a, chak pawh kan phuin ka hria. Chanmari hneh chunga final thlen hi a hlu bik a ni," tiin Vanglaini hrilh.