Neves-a'n PSG a zawm ta

Paris St-Germain chuan Benfica midfielder Joao Neves an la lut a, a man zat hi pound maktaduai 50 niin, a khelh ṭhat dan a zira £60mtd thlenga sang chho thei tura tih a ni.

Manchester United nen pawha sawizawm hlawh hman midfielder hian kum nga khel turin contract a ziak a, kum 19 mi lek a la nih avangin hmabak a nei êng hle.

Portugal tan pawha vawi kua inlan tawh Neves hian nikum January khan Benfica tan a match hmasa ber a khel ve chauh a, mahse, theihna sang tak nei a nih avangin player pawimawh a ni nghal.

Portuguese club tan hian inelna hrang hrangah match 75 a khel hman a, goal li khungin, assist vawi thum a nei. PSG president Nasser Al-Khelaifi chuan, "Joao hi Portugal mai ni lo, khawvel huap ang pawha player talent nei ṭha tak a ni.

"Paris St-Germain a zawm thei hi a lawmin, he club tana theihtawp chhuah hi a châk tawh takzet a, chu chu kan player-te ṭheuha kan beisei pawh a ni reng a ni," a ti a, Neves an chang thei chu a lawm hle.

Euro khelh zawh taka Portugal tana vawi hnih inlan Neves chuan, "Hmachhawp lian tak neitu Paris St-Germain ka zawm thei hi ka lawm hle - ka khelhpuite pui turin theihtawp ka chhuah dawn a, he club ropui takah hian hmasawn a, nomawi chawi zel ka tum dawn a ni," a ti a, a phur hle.