Mipa 100m pakhatna Noah Lyles; A chakna chu second 0.005 chauh!

Second khat rei loh zia kan hria, mahse hei hian thil tam tak a ti danglam thei - second khat hi hmun sangngaah ṭhen sawm leh ta ila, chumi zinga pakhat lek chu Olympic gold medal lak nan a tawk a ni!

Paris Olympic 2024 neih laia mipa intlansiakah Noah Lyles chu pakhatna a ni. United States sprinter hi amah hnaih bertu Kishane Thompson aia a thlen hmasakna chu second 0.005 chauh a ni a, mit khap kar pawh a tling lo hial ang.

Pathianni zan intlansiak hi khawvelin a ngaihven, 100m intlansiak hi chu khawvel ngaihven a ni ziah. US mi Lyles hi second 9.79 chhungin a thleng a, pahnihna Jamaican mi Thompson nen hian thleng rual angin lang mah se, khawl hmanga endikna aṭangin an inkar tlemte hi a lang.

Kum 27 mi Lyles leh Thompson te hnungah hian United States aiawhtu Fred Kerley a thleng, world champion pawh lo ni tawhtu hian 100m tlan thleng turin second 9.81 a hmang thung a, rinkai zinga mi Akani Simbine (South Africa) erawh dawhsan lawn zingah a tel phak ta lo.

Mipa 100m intlansiak final hmachhawntu mi pariat te an inum tawk takzet. Stade de France-a intlansiakah hian a hmasa bera thleng Lyles leh a hnuhnung ber inkarah pawh second 0.12 chauh a awm hial a ni.

Olympic champion lai Marcell Jacobs chu panganaah a thleng - Italian tlangval hian second 9.85 chhungin a thleng a, kumin atana a tlan ṭhat ber ṭum ni mah se a elpui te an tlan chak em avangin gold medal humhim nan a tawk zo lo.

Kum 20 hnuah!

American miten infiamna khawmpui lian an awp hneh ṭhin hle, mahse mipa 100m intlansiak erawh an thunun lohna a rei tawh hle - Athens 2004 Olympic hnuah kumin hi US tlangval a chak lehna hmasa ber a ni hial.

Athens Olympic-ah khan Justin Gatlin a chak, tunah a sulhnu chu Lyles hian a rawn chhui leh ta chiah. Lyles chuan, "Hetiang baka a hmawr bawkna ṭha hi chu a awm leh thei tawh chuang lo ang, round tin maiah hma ka sawn.

"Semifinal kan tlan khan second 9.89 chhungin kan thleng, final bika hun ka hmang thlem leh sawt ta kha lawmna tur zel a ni," a ti. Semifinal-a a hun hman ang hi final bikah chuan pangana in hun a hman nen a intluk hial a ni.

Final boruak sang leh hmuhnawm takah Fyles hi ba tira tlan ṭha ber pawh a ni lo, tlan tur chin a chanve an tlan lai chuan pasarihnaah a awm, a hnung ber dawta awm chungin 50m chhungin a hma a awmte a tlan pel vek!

Lyles tan Olympic bikah chuan gold medal hmasa ber a ni, khawvel huapm inelna dangah erawh US tan a lo hlawhtling tawh ṭhin. Nikim World Championship-ah pawh khan 100m leh 200m huangah pakhatna a lo ni kawp tawh.

Jamaican sprinter ropui Usain Bolt (2015) hnuah, world championship-a hetiang ti leh thei hmasa ber hi a lo ni tawh a, hei mai bakah hian 4x100m relay-ah a hlawhtling bawk, sulhnu a nei ṭha hle a ni. Tokyo Olympic-ah khan 200m intlansiakah bronze medal a lo la tawh bawk.