Mancini chungah rinna kan nghat - Inter president

Inter Milan president Erick Thohir chuan club thuneitute chuan manager Roberto Mancini chungah rinna an la nghah tlat thu a sawi.

Serie A club Inter Milan-ah hian Chinese investor Suning Commerce Group Co Ltd. chuan neitu nihna 70% bawr vel zet an nei tawh a, Chinese Super League club Jiangsu Suning neitute hian Inter-a thuneihna sang tak nei tur hian pound maktaduai 212 a seng hial.

Inter Milan-a neitu nihna nei hnem ber ṭhin Thohir (70%) hian a chan aṭanga 40% zet chu Suning Commerce Group Co Ltd. lakah hian hralh tawh mah se president nihna a la luah chhunzawm zel.

Thawhlehnia shareholders ho an inhmuhkawm hnuah kum 46-a upa Thohir chuan, "Mancini chungah hian rinna kan la nghat lian hle. Hna ṭha taka a thawh bakah he club-in hmalam a pan theih nana a thawh hlawk hle," tiin a sawi.

Indonesian Thohir hian club thuneitute chuan an manager hi an la titi pui tur thu leh Champions League khel phak ngei tura hma-sawn an mamawh thu a sawi tel bawk.

Season hmasa kha Inter hian Serie A-ah point 67 hmuin palina dinhmun an luah a, an chung chiaha awm AS Roma chu point 13 zetin an phak lo thung - champion Juventus-in point 91 zet an hmuh avangin Inter tan hmasawn a ṭul hle.