Spurs player thar tur Yang

Tottenham Hotspur chuan South Korean winger Yang Min-hyuk chu K League club Gangwon FC aṭangin an la lut a, mahse, kum 18 mi forward hian January 2025-ah a club thar hi a zawm ve chauh ang.

Yang hian Gangwon tan match 25 khel tawhin goal riat a khungsak a, player hmabak nei êng tak a nih avangin Spurs hian English football lamah an seng lut - kum 2030 thleng an hnena khel turin contract hi an ziahpui.

March thla khan Yang hian Gangwon tana a goal hmasa ber khungin, kum 2013 hnua K League-a goal khung thei naupang ber a ni. Spurs hian captain Son Heung-min an kawl mek a, tun hmain Lee Young-pyo an nei tawh ṭhin bawk - Yang hi player pahnih hnua South Korean mi, Spurs zawm leh hmasa ber a ni.

Ange Postecoglou enkawl Spurs hian Yang hmain kum 18 mi midfielder Lucas Bergvall chu Swedish club Djurgårdens IF Fotboll aṭangin pound maktaduai 8.5-in an lei tawh a, Leeds United aṭangin kum 18 mi midfielder Archie Gray chu £40mtd-a leiin, kum 16 mi George Feeney chu an la lut tawh bawk - a man zat tarlan a ni lo.

Spurs-in tun nipuiah player pali an lei tawh tihna a ni a, kum 20 hnuai lam vek an ni thung - hma hun thlirin player an la lut a ni rih ber e!