Bosch Home Appliances LPS Fight Night a hlawhtling; Johnkenty tan Pushpak Verma a nem lua e!

Mizo boxer ṭha HC Johnkenty Vanhlimpuia'n professional boxing bul a ṭan ta a, a khingpui Pushpak Verma chu round hnihna second 40 lekah technical knockout hmangin a hneh a, a tan Bosch Home Appliances LPS Fight Night lightheavyweight title la turin harsatna a awm lo.

Zirtawpni zan khan LPS Arena khat tlatin mipui an pungkhawm a, inhnek hmuhnawm mah se a rei lo. Round hnihnaah Vana'n a khingpui luah a hnek fuh a, ring kilah nawr bet zuiin Rajasthan boxer Verma a talbuai, chhang let thei loin a inveng ringawt, referee Malsawmsanga'n inhnek a titawp.

Johnkenty chungnung

Round hnihna ṭan aṭanga second 40-ah Tuipui boxer a chak a, kum nga leh thla li chuang hnua Mizorama a inhnek leh hmasak berah a chet ṭhat a chhunzawm a, boxing coach nih zui a tum avangin a inhnek hnuhnun ber tur a ni tawh a beisei tih a sawi nawn leh a, a inhnek ngaihlutu Mizo mipui chungah lawmthu a sawi a ni.

Indian Navy boxer Vana hian March 12, 2019 khan LPS Pro Fight lightheavyweight title fight-ah round khat khel zo loin amah chotu Hrianghmun tlangval DK Munga a knockout a, tun hi Mizorama a inhnek leh hmasak ber niin professional boxing a luhchilh nghal a ni.

Tualchhung inelna ngaihhlut Pro Fight middleweight-ah vawi hnih a champion zawn hnuah, kum 2016 khan lightheavy-ah a insawn a, he huangah hian Mizo leilunga a inhnekpui hnuhnun ber Verma nen knockout hmangin vawi sarih a chak zawn hial.

Kum 29 Verma tan erawh Johnkenty kha anchhia ang mai a ni thung - professional a luhchilh aṭanga a inhnek hmasa pathumah a chak vek a, mi pahnih chu a knockout. Beiseina sang tak nen Mizoram rawn pan mah se a ṭang rei thei lo.

A tira ruahman dan chuan Vana hi Mizo boxer ṭha R. Malsawmtluanga nen inhmachhawn tura tih a ni, mahse hun tepter tawh takah Mala hi a inhnukdawk, hei vang hian Verma hi chawpchilh taka sawm a ni. Vana hmaah a inringtawk lo tih a khelh dan aṭangin a lang a, mipui beiseina inhnek a lantir zo lo a ni.

Dinsanga leh midang

Bantamweight inhnek a hmuhnawm - Laldinsanga'n tun hma lama a lo hmachhawn tawh Ramdinthara chu a hma aia chiang zawkin a hneh. Ramthar Lunglei boxer-in round tin la vekin judge pathum point pekah 60-54 vekin a chak a, professional boxing vawi sarih a khelhna niin a chak vek.

Kum 21 mi Dinsanga'n knockout theih ngei a inring a, thahrui a ngahin a thiam bawk - chutihrualin inhnek thunun zawk viau mah se round ruk a inhnek hmasak berah Pangzawl tlangval Ramdina a ding tluan ve tlat a ni.

Inhnek dangah Lalruatzela Hauzel chuan Lalmuanpuia hnehin professional huangah a chak zawn a, tualchhung boxer ṭha inhnek dangah Vanlalenkawltir leh Lalrinngheta an inhnehtawk thung.

Ruatzela'n round li la vekin judge pathumin 40-36 vekin an chaktir a, professional a luhchilh aṭanga a inhnek hmasak pahnihah tlawm zawn mah se nikum Pro Fight welterweight title fight nen vawi hnih a chak zawnna a ni.

Super flyweight-ah Enkawla'n a vawi khat nan professional boxing-a chak a tumna a tihlawhtling zo lo, amah aia kum khata upa, kum 22 mi Rinngheta nen round li an inbeih hnuah judge pakhatin 40-36-in round tinah a chaktir a, mahse, judge pahnih 38-38 ve ve an pek avangin an inhnehtawk phah ta a ni.

Dinthar Champhai figher Enkawla'n bei viau mah se chak tur khawpin judge pahnih a hmin zo lo a, a pantu leh hnek chhuak tam zawk a nih laiin Tuipui tlangval Rinngheta'n tawlh kual pahin fuh tak takin a hnek let fo a, boxer pahnih an fimkhur lutuk avangin inhnek a nung tawk lo.